Fjala e Kryetarit të Komunës së Klinës , Sokol Bashota gjatë seancës së Asamblesë Komunale me rastin e festës së Pavarësisë
Më lejoni t’ju drejtohem me këtë fjalë rasti në shënim të përvjetorit të shpalljes së pavarësisë së Kosovës.
Republika e Kosovës i mbushi 6 vjet të jetësimit të saj. Shpallja e Pavarësisë së Kosovës, më 17 shkurt të vitit 2008 ishte akt historik dhe sublimues i të gjitha përpjekjeve dhe i luftërave të pareshtura të shumë brezave për liri dhe mëvetësi shtetërore të vendit tonë. Ne sot nderojmë deri në përkulje ata që i vunë gjoksin stuhive e rrebesheve të historisë dhe vendosën themelet e Kosovës së lirë, të pavarur dhe demokratike. Gjej këtë rast solemn t’u shpreh mirënjohje dhe nderim deri në pietet për gjithë ato bija dhe bijë më të shtrenjtë të U ÇK-së, që me gjakun e tyre murosen themelet e shtetit të Kosovës, të kësaj toke të larë me gjak, mirëpo sot hapëron drejt një të ardhme shumë të ndritur. Për rrugën e arritur deri këtu, shpreh mirënjohjen më të thellë gjithë miqve tanë ndërkombëtarë, në krye me SHBA e BE dhe vendeve anëtare të NATO-s dhe të gjithë botës demokratike, që u vunë në anën e së drejtës dhe bënë të mundur çlirimin e shpejtë dhe pavarësimin e Kosovës, rindërtimin dhe demokratizimin e saj, afirmimin ndërkombëtar dhe njohjen nga mbi njëqindegjashtë vende të botës, anëtare të Organizatës së Kombeve të Bashkuara.Kosova duhej çliruar sepse e meritonte lirinë. Historia e saj është histori e luftërave të drejta për liri. Kosova duhej të shpallej e pavarur, sepse kishte derdhur gjakun lumë për pavarësinë dhe kishte fituar, sepse ky ishte vullneti dhe gjakimi shumëshekullor i qytetarëve të saj. Kosova e cilësuar me numër, më 17 shkurt u pagëzua me emrin e saj të plotë e të merituar: Republikë e pavarur, sovrane dhe demokratike. Kosova gjatë këtyre gjashtë viteve të pavarësisë ka bërë hapa të mëdhenj, drejt ndërtimit e konsolidimit të shtetit demokratik, drejt ngritjes së institucioneve shtetërore, drejt fuqizimit të subjektivitetit ndërkombëtar e zhvillimit të gjithanshëm shoqëror e ekonomik, por si çdo fillim, e sidomos ai i jetës së pavarur të popujve të sapo dalë nga luftërat çlirimtare, është i vështirë. Ja përse Kosovës, sikur në luftë edhe sot i duhen energjitë e potencialet e bashkuara për të arritur hapin e kohës dhe për të zënë proceset historike, nëpër të cilat po kalon rajoni ynë. Ne duhet t’i mësojmë fëmijët tanë, jo vetëm ta duan vendin e tyre të shenjtë, por të përgatiten për të bërë punë dhe vepra të mëdha për të. E ardhmja e vendit tonë është në duart tona dhe duhet ndërtuar me duart tona, në mënyrë që brezave t’u sigurojmë një ardhmëri çfarë meritojnë. Vetëm duke dyfishuar ritmet e zhvillimit, Kosova mund të barazohet me vendet e lira prej kohësh, vetëm duke shfrytëzuar gjithë potencialin dhe vlerat e saj, mund të hyjë denjësisht dhe kokëlartë në familjen e integruar evropiane, atje ku e ka vendin gjeografikisht, historikisht, politikisht dhe kulturalisht.Dialektika e historisë do të gjejë rrugët e përparimit, duke mënjanuar pengesat dhe duke hedhur tej përfaqësuesit e së kaluarës së hidhur historike. Në këtë përvjetor vjen fuqishëm zëri i kushtrimit nga vitet e rezistencës dhe nga vargu i pambarim i dëshmorëve të lirisë, vjen thirrja amanet e kryetrimit tonë legjendar, komandantit Adem Jashari, për të mbrojtur fitoret historike, për të kultivuar vlerat e traditës së shkëlqyer të popullit tonë dhe për të përparuar e zhvilluar vendin e të parëve tanë. Para nesh është beteja e madhe e zhvillimit ekonomik, e zhdukjes së varfërisë, e zhvillimit demokratik dhe e sundimit të plotë të ligjit e të rendit në shoqëri. Kosova po hyn në vitin e 6-të të pavarësisë, si shtet modern evropian, demokratik dhe me respekt e njohje të gjerë ndërkombëtare. Ajo përbën sot një faktor shumë të rëndësishëm të ndërtimit të paqes.
Ky përvjetor i shënuar po vjen më të arritura të konsiderueshme. Këto të arritura nuk duhet të na entuziazmojnë, të na krijojnë emocione vetëkënaqësie, sepse ne duhet të punojmë akoma edhe më shumë, sepse qytetarët tanë kanë nevoja edhe më të shumta, për një jetë edhe më cilësore dhe më kualitative. Këto të arritura të na shërbejë motivim për angazhim edhe më të madh, në mënyrë që qytetari ynë të ketë një mirëqenie edhe më të avancuar. Shpresoj se jo vetëm ky përvjetor, por edhe përvjetorët e tjerë të shënimit të pavarësisë së vendit, do të na shërbejnë për të treguar rezultate edhe më të fuqishme si në realizimin e projekteve, ashtu edhe në forcimin e demokracisë në të gjithë vendin. Duhet përsëritur edhe një herë se e gjithë kjo që po bëhet është rezultat i një vepre madhore, siç është pavarësia e Republikës së Kosovës.
Gëzuar pavarësinë e Kosovës! Lavdi të gjithë atyre që jetën e dhanë për këtë ditë të shënuar! Ju faleminderit.
