Komuna e Klinës njofton qytetarët se më 05 qershor 2026 është mbajtur dëgjimi publik lidhur me projektin e infrastrukturës për zgjerimin dhe ndërtimin e rrugës “Malë Bashota” në Zonën Kadastrale të Dresnikut.
Takimi është udhëhequr nga nënkryetari i Komunës së Klinës, z. Fadil Gashi, në prani të drejtorit të Urbanizmit dhe Mbrojtjes së Mjedisit, z. Enver Berisha, drejtorit të Kadastrit, Gjeodezisë dhe Pronës, z. Nikson Daka, si dhe përfaqësuesve të kompanisë projektuese.
Gjatë dëgjimit publik janë prezantuar detajet e projektit, përfshirë planifikimin e punimeve infrastrukturore dhe procedurat e parapara për shpronësimin e pronave që preken nga realizimi i projektit.
Të pranishmit patën mundësinë të informohen në detaje për projektin, të paraqesin komente dhe sugjerime, si dhe të shtrojnë pyetje lidhur me procesin e zbatimit dhe ndikimin e tij në zonën përkatëse.
Komuna e Klinës mbetet e përkushtuar për të garantuar transparencë, informim të drejtë dhe pjesëmarrje aktive të qytetarëve në të gjitha fazat e realizimit të projekteve me interes publik.
