Në praninë e udhëheqjes komunale të Klinës, në krye me kryetarin e komunës, z. Sokol Bashota, me ish- kryetarin e Kuvendit të Republikës së Kosovës, z. Ilaz Ramajli, me bashkëpunëtorët e tij, z. Muharrem Shabani dhe z. Skënder Skenderi, deputetëve aktualë të Parlamentit të Kosovës, anëtarëve të Kuvendit Komunal, qytetarëve, familjarëve të këtyre personaliteteve etj., për pesë ish- delegatë të legjislacionit të vitit 1990, Bajram Buqani, Nikollë Shabani, Hisen Bashota, Halil Maxharaj dhe Halit Kryeziu, u ndanë çmimi me titull “Nderi i Qytetit”.
Kryetari i Komunës, z. Sokol Bashota, me këtë rast tha se :Shqiptarët e kanë përjetuar një rrugëtim të vështirë gjatë gjithë rrugëtimit historik për të mbërritur deri këtu. Jo vetëm që e deshën vendin dhe atdheun e tyre, por me përpjekjet, luftën dhe sakrificën e tyre kontribuuan në zgjimin e vetëdijes kombëtare tek brezat tanë. Si gjeneratë e re, ne nuk mund t’u hyjmë në borxh të ndonjë ngjarje historike. Prandaj, për të mos bërë një gabim të tillë, Asamblesë Komunale i jam drejtuar me kërkesë për laureimin e këtyre personaliteteve me ndarjen e Çmimit “Nderi i Qytetit. Vendimi i asamblistëve të Kuvendit ishte unanim, ku me këtë rast falënderoj të gjithë. Këta ush-delegatë të Kuvendit të Republikës së Kosovës, në atë kohë të okupimit, më 2 korrik 1990, shprehen vullnetin e qytetarëve të Kosovës – miratuan Deklarata Kushtetuese, që 1990 ishte akti që do të shënojë hapin historik institucional të pavarësimit të Kosovës, duke sublimuar me miratimin e Kushtetutës se Republikës së Kosovës, më 7 Shtator 1990. Ne si institucion ju jemi mirënjohës për këtë akt të madhërishëm dhe sublim që kanë bërë. Historia nganjëherë ju jep mundësi për të dhënë për vendin e tyre. Këta ish-deputet sakrifikuan dhe i thanë jo Serbisë, duke trasuar rrugën e Kosovës drejt realizimit të aspiratës shekullore. Periudha e fundit ishte rezultat i atyre përpjekjeve të këtyre brezave, që u kurorëzuar me çlirimin e vendit. Ata, dëshmorët, nuk kanë nevojë për ne, sepse ne kemi nevojë për ta. Gjaku, sakrifica dhe mesazhet e tyre duhet të na shërbejnë frymëzim dhe udhë rrëfim për të ecur përpara, për t’i ndërtuar dhe forcuar shtyllat e shtetit të republikës së Kosovës, në ecje për t’u integruar në strukturat euro-atlantike”, ka thënë kryetari Bashota. Në emër të ish-delegatëve të Republikës së Kosovës, duke iu drejtuar të pranishmëve, ish-kryetari i Kuvendit të Kosovës, Ilaz Ramajli, i cili tha se: Përfitoj nga rasti që të falënderoj kryetarin e Komunës, z. Sokol Bashota dhe Kuvendin e Komunës së Klinës, për ndarjen e këtyre çmimeve këtyre ish delegatëve të Kuvendit të Republikës së Kosovës, së viteve ’90. “Duke i nderuar këta delegatë ju po vlerësoni kontributin e tyre, po shprehin respektin dhe kujtesën për një plejadë të përfaqësuesve të denjë të Kosovës. Këtë akt tepër admirues, po e bëni më 7 Shtator, datë kjo që paraqet një nga ngjarjet më të rëndësishme të historisë sonë. Ngjarjet e mëvonshme ishin akte mbrojtëse. Lufta e UÇK-së dëshmoi më të drejtë aspiratat dhe vullnetin e popullit të Kosovës, që u sublimua falë sakrificës dhe gjakut të dëshmorëve të kombit dhe ndihmës së miqve tanë ndërkombëtarë”, theksoi z. Ramajli.
