Komuna e Klinës ka nisur zyrtarisht organizimin e dëgjimeve buxhetore në kuadër të procesit të hartimit të Draft-buxhetit për vitin 2027 dhe planifikimit buxhetor për periudhën e ardhshme trevjeçare.
Takimi i parë i dëgjimeve buxhetore u mbajt në sallën e konferencave të Komunës së Klinës, me pjesëmarrjen e kryetarëve të këshillave të fshatrave, të cilët përfaqësuan kërkesat dhe prioritetet e banorëve të komuniteteve të tyre.
Në takim morën pjesë kryetari i Komunës së Klinës, Prof. Dr. Zenun Elezaj, nënkryetari Fadil Gashi, drejtori i Urbanizmit Enver Berisha, drejtori i Arsimit Qemajl Sejdija, si dhe shefi i Sektorit të Financave dhe zyrtari përgjegjës për dëgjimet buxhetore, Egzon Sejdiu.
Gjatë takimit u diskutua për projektet me prioritet, të cilat paraqesin nevoja të domosdoshme për komunitetet dhe kërkojnë trajtim dhe planifikim në kuadër të buxhetit të ardhshëm.
Për të ofruar një pasqyrë sa më të qartë dhe të kuptueshme të planifikimit buxhetor, të dhënat dhe projektet u prezantuan përmes tabelave të strukturuara dhe vizuale. Kjo qasje synon të lehtësojë kuptimin e të dhënave buxhetore dhe të rrisë transparencën, pjesëmarrjen dhe angazhimin e qytetarëve në proceset vendimmarrëse.
Gjatë takimit, kryetarët e Bashkësive Lokale prezantuan kërkesat dhe prioritetet e banorëve, duke paraqitur projektet dhe nevojat kryesore të komuniteteve të tyre.
Kryetari i Komunës së Klinës, Prof. Dr. Zenun Elezaj, theksoi se Komuna e Klinës ndër vite është dalluar për nivelin e lartë të përfshirjes së kërkesave të qytetarëve në planifikimin dhe realizimin e projekteve buxhetore.
“Komuna e Klinës mbetet e përkushtuar që përmes një procesi transparent dhe gjithëpërfshirës të ndërtojë një buxhet që reflekton nevojat reale të qytetarëve dhe prioritetet e komuniteteve. Zëri i qytetarëve është pjesë e rëndësishme e këtij procesi dhe kërkesat e tyre do të shqyrtohen me përgjegjësi gjatë hartimit të buxhetit për vitin 2027 dhe planifikimit për periudhën trevjeçare”, theksoi kryetari Elezaj.
Komuna e Klinës do të vazhdojë me organizimin e dëgjimeve buxhetore edhe në fshatra, me synim që procesi i planifikimit të buxhetit të jetë sa më transparent, pjesëmarrës dhe në përputhje me nevojat dhe prioritetet e qytetarëve.
