Kryetari i Komunës së Klinës, Zenun Elezaj, priti zyrtarët e Aleancës Kosovare të Biznesit
Kryetari i Komunës së Klinës, Prof.Dr Zenun Elezaj, sot është takuar me udhëheqësit e Aleancës Kosovare të Biznesit, dr. Agim Shahini dhe Lumnije Ajdini, me të cilët është diskutuar për harmonizimin e qëndrimeve për të ndihmuar bizneset vendore, promovimin dhe krijimin e kushteve për investitorë të jashtëm. Është biseduar për hapjen e një zyre të AKB-së në Komunën e Klinës, që do të jetë edhe një pikë reference e bashkëpunimit e koordinimit në mes Komunës së Klinës dhe këtij Agjensioni për çështjet që kanë të bëjnë me biznesin.
Kryetari Elezaj, ka treguar se Klina është e interesuar të bëjë promovimin e resurseve biznesorë që ka kjo Komunë dhe ka shprehur gatishmërinë për bashkëpunim dhe krijimin e kushteve të favorshme për investitorë të huaj që dëshirojnë të investojnë në Komunën e Klinës.
Në takim është biseduar edhe për mundësitë e binjakëzimit të Komunës së Klinës me ndonjë Komunë të Bashkimit Evropian që kanë karakteristika të njëjta.
Elezaj dhe Shahini, kanë biseduar edhe për krijimin e lehtësirave për bizneset derisa është kërkuar që taksat që paguajnë në TVSH dhe dogana, bizneset e Klinës, të derdhen në buxhetin e Komunës.
“ Qëllimi ynë i përbashkët është që të dëgjohet zëri i bizneseve dhe bashkërisht të harmonizohen qëndrimet. Bashkërisht do të fillojmë që Klinën ta promovojmë edhe në arenën ndërkombëtare”, është thënë ndër të tjera në këtë takim në të cilin kanë marrë pjese edhe përfaqësues të biznesit.
