Në prani të kryetarit të Komunës së Klinës, Zenun Elezaj dhe drejtorit të Drejtorisë për Urbanizëm, Lorenc Marleku, kanë filluar punimet për ndërtimin e kanalizimit në fshatin Zllakuqan, përkatësisht lagjen Pataqan të këtij fshati.
Kryetari Elezaj, tha me këtë rast se ky është një projekt mjaft i rëndësishëm për banorët e lokalitetit të Zllakuqanit, përkatësisht edhe të lagjes së këtij fshati, të Pataqanit, sepse është një projekt jashtëzakonisht i rëndësishëm, sepse do të mundësojë që për banorët e këtushëm jeta të jetë më e mirë se sa deri tash. Me rregullimin e këtij kanalizimi do të plotësohet një nevojë e kahershme dhe tepër imediate e këtij komuniteti, të cilët kanë vuajtur shumë nga kundërmimi që është shkaktuar nga depërtimi i ujërave të zeza nëpër pronat e tyre. Ky investim është investimi infrastrukturor i parë në Pataqan, me ç’rast ne do t’i japim prioritet atyre vendeve, sikurse kësaj lagje, në të cilët nuk është bërë deri me tashmë asnjë investim ” tha ndër të tjera kryetari Elezaj.
Banorët e këtij lokaliteti falënderuan pushtetin lokal dhe iu gëzuan kësaj vepre infrastrukturore të këtij pushteti dhe sipas tyre me ndërtimin e këtij kanalizimi, sepse banorët e këtij fshati, gjegjësisht të kësaj lagje të Zllakuqanit, po e lënë pas një problem jashtëzakonisht të madh që këtyre banorëve iu ka paraqitur vështirësi me vite të tëra.
Ky investim do t’i kushtojë Komunës së Klinës në buxhet prej 58.255,84€, mjete këto të siguruara nga buxheti i Komunës, ndërsa pritet që projekti të përfundojë brenda një periudhe kohore prej 28 ditësh. Kanalizimi do ta ketë gjatësinë prej 2.696 metra.
Për këtë projekt është kontraktuar kompania “Alti Com”, nga Klina.
