POST SCRIPTUM PAS FESTIVALIT “I KËNDOJMË LIRISË KLINA 2015” NË DITËLINDJEN E MUJË KRASNIQIT NË KLINË IU KËNDUA MUJËS DHE GJITHË DËSHMORËVE TË KOMBIT Për të 15-të herë me radhë në Klinë filloi festivali folklorik “ I këndojmë lirisë”. Festivali filloi te Kulla muze e Komandantit Mujë Krasniq, i në fshatin Çabiq. Kishte mysafirë të shumtë nga të gjitha viset shqiptare. Përpos qytetarëve te shumtë prezent ishin edhe kryetarë komunash, bashkëluftëtarë të Mujë Krasniqit, deputetë të Kuvendit të Kosovës edhe artdashës. Hapjen zyrtare e bëri z. Sokol Bashota, kryetar i Komunës dhe drejtor i festivalit folklorik “ I këndojmë lirisë”. Ai pasi i përshëndeti të gjithë të pranishmit dhe duke ju dëshiruar suksese të gjitha grupeve artistike garuesve në festival u shpreh: “Ndjehem krenarë dhe shumë i nderuar që sot para jush të hap edicionin e 15 –të të festivalit folklorik “ I këndojmë lirisë”. Në ditëlindjen e komandant Mujë Krasniqit, në oborrin ku lindi u rrit e u brumos Muja qysh si fëmijë me idealet e shenjta të atdheut, kombit dhe lirisë. Ky festival tani i ka kaluar kufijtë lokal, sepse prurjet artistike kanë siguruar që festivali folklorik “I këndojmë lirisë” të radhitet si njëri ndër festivalet më të rëndeshim artistik në hapësirën kulturore të shqiptarëve”, tha kryetari Sokol Bashota. Ndërsa në emër të fshatit Çabiq të pranishmit i ka përshëndetur poeti, shkrimtari dhe publicisti Prend Buzhala, i cili tha: “ Festivalet bashkojnë njerëzit, ndërsa folklori është shenja më e mirë e identitetit të qenies sonë kombëtare dhe bashkimit kombëtar. Sot “Sofra e Çabiqit” bashkon të gjitha trojet shqiptare, kjo sofër është simbol i mikpritjes e i bujarisë që kemi tradicionalisht ne kombi ynë”. Publicisti Prend Buzhala kishte ardhur në festival me librin e tij “Ata hynë vetë në këngë”, i cili doli nga shtypi sot në ditëlindjen e Komandant Mujë Krasniqit. Libri u kushtohet tri figurave të luftës Mujë e Ali Krasniqi dhe Beqir Gashi. Para shtatores së heronjve të kombit Mujës, Beqës dhe Alisë u shfaq edhe një program i pasur kulturo artistik. Më pastaj u shtrua Sofra tradicionale e Çabiqit me ushqime tradicionale për të gjithë pjesëmarrësit. Pas Çabiqi aktivitetet kulturo – artistike vazhdoi në Klinë, pikërisht në Qendrën e Kulturës “Jehona e Dukagjinit”, u promovuan libri e Prend Buzhales “ ATA HYN NË KËNGË”, dëshmorët Mujë Krasniqi, Beqir Gashi dhe Ali Krasniqi. Për librin folën poeti Hajdin Morina dhe redaktori i librit Ismet Krasniqi. Po ashtu u promovua libri poetik “TA PUTHA LOTIN” e autores Valdete Berisha, e cila jeton e vepron në diasporë në Belgjikë. Për librin foli Prend Buzhala. Për librin “Përtej Stinëve” poezi të autorit Hajdin Morina folën: Prend Buzhala e Sejdi Berisha. Kryetari i Komunës z. Sokol Bashota i përgëzoi autorët e librave me rastin e promovimeve të tyre. Pas promovimit të librave në Qendrës të Kulturës “Jehona e Dukagjinit” u hap ekspozita nga arti figurativ e Valdete Berishës. Ekspozitën e shpalli të hapur piktori Idriz Berisha. Për tri net me radhë grupet artistike pjesëmarrëse në festival zhvilluan performancë artistike-defile artistik në sheshin “Mujë Krasniqi” në Klinë. Për tri net me radhë në skenën e festivalit u paraqiten në konkurrencë mbi 60 grupe artistike, grup rapsodësh e rapsodë. Në këto tri net me radhë pamë përzgjedhjen e Drejtorisë artistike që këtë vit ishin mjaft cilësor. Drejtoria artistike ishte në përbërje, Halit Gashi, Fatmir Berisha dhe Daut Gashi, të cilët kishin përzgjedhur grupet artistike për të dalë në skenën e festivalit 700 artistë nga shumë vende të hapësirave tona etnike. Në natën e parë ishte e veçantë hapja e festivalit në skenën e festivalit. Festivalin e shpalli të hapur Kryetari i Komunës z. Sokol Bashota. Po ashtu e veçanta tjetër e festivalit ishte nata e fundit, ku me një konkurrencë të madhe vlerash në skenën e festivalit, sigurisht se edhe juria në përbërje: Prof. Dr. Zymer Neziri, Sejmen Gjokoli dhe Blerim Peci, nuk e patën lehtë për të bërë përzgjedhjen e më të mirëve. Vjen koha për të dalë juria në skenë për t’i bërë publik fituesit. Me këtë rast, Juria ndau këto Çmime: ÇMIMIN “ Mujë Krasniqi” SHKA “ ILIRIDA”- Shkup; vendi i dytë: SHKA “ Tradita” Anamal- Ulqin; vendi i tretë, Grupi polifonik “ Idriz Sulli” Gjirokastër; Çmimi i publikut, SHKA “ Agim Ramadani” Gjilan, veterani i festivalit, rapsodi Ali Krasniqi Malishevë; instrumentisti më i mire, Besnik Osmanollaj – Gjonaj; interpretuesi më i mirë, Shefki Saliu Kastriot; valltari më i mire, Ilir Loku SHKA “ Ilirida” Shkup; grupi më i mirë i rapsodëve, Zymer Kryeziu me grup Malishevë; dueti më i mire, Naim Krasniqi e Sylë Nishori Prizren; zëri më i mirë i festivalit, Jeton Fetiu Dardanë; veshja më autentike ,SHKA “Malsori” Gjonaj – Has,orkestra më e mire SHKA “Selman Kadria” Istog,Ansambli më i kompletuar AKV “Bajram Curri” Prishtinë, vallja më e mire koreografike AKV “Dëshmoret e kombit” Obiliq. Kryetari i Komunës pasi e dorëzoi çmimin “Mujë Krasniqi” e shpalli të mbyllur festivalin folklorik “I këndojmë lirisë” 2015” me dëshirë që të takohemi prapë në qershorin e vitit 2016. Nga ky moment për disa minuta qielli i katërt mbi qytetin e Klinës u ndriçua me koloritin fishekzjarrëve.
Klinë, 11 qershor 2015
ZËDHËNËSI I FESTIVALIT, Ismet Krasniqi
