Akademi Përkujtimore për Muhamet S Haxhaj

 Muhamet Haxhaj ishte njeri i sakrificës sublime dhe i brumosur në ideale të mëdha.
 Akademia  Përkujtimore  e cila u mbajt sot ,në përkujdesjen e kryetari të komunës Sokol Bashota me rastin e 15-të  vjetorit të rënies së dëshmorit Muhamet S Haxhaj ,  shpalosi  vlerat e luftës çlirimtare  të UÇK-së .Në emër të kryetarit Sokol Bashota , foli Zeqir Morina , i cili tha se: Më lejoni që në emër të Komunës së Klinës ,z.Sokol Bashota dhe në emrin tim personal t’ju shpreh  mirëseardhje në këtë akademi përkujtimore me rastin e pesëmbëdhjetë vjetorit të  rënies heroike të  dëshmorit të  kombit Muhamet Haxhaj. Muhamet Haxhaj ishte njeri i sakrificës sublime dhe i brumosur në ideale të mëdha. E donte jetën, por një jetë të dinjitetshme. Të jetosh me dinjitet të nëpërkëmbur për të ishte sikur të ishe i vdekur për së gjalli. Prandaj kishte vendosur të punonte dhe të luftonte  deri në pikën e fundit të gjakut  që e dinjitetshmja të triumfonte mbi të padinjitetshmën dhe mbi servilizmin. Jeta pa dinjitet dhe prej mentalitetit të robit për Muhametin ishin inekzistente, prandaj i urrente, i sfidonte. Dhe sfidat ishin të mëdha, të cilat i takonte kudo, në shtëpi, në rrugë, në institucione. Prandaj punonte që ato të mos ekzistonin, sepse kishte neveri për to. Lufta dhe sakrifica e Muhamet Haxhajt dhe e shokëve të tij të cilët ranë në altarin e shenjtë të lirisë së atdheut, ishte një luftë trimash, idealistësh. Muhamet Haxhaj, atdhetari dhe luftëtari i lirisë, ra heroikisht më 3 korrik të vitit 1998, duke kurorëzuar përpjekjet dhe synimet e tij për të mirën e atdheut. Ishte një kurorëzim madhështor, që i dha epitetin e dëshmorit, epitet që e bën të pavdekshëm, të paharruar dhe të nderuar përgjithmonë nga ne dhe brezat që do të vijnë…

Për jetën dhe veprën e Muhamet Haxhaj ka folur edhe  Kryetari i OVL të UÇK-së, Muharrem Xhemajli. Akademia eshte përmbyllur me shfaqjen  e një dokumentar kushtuar dëshmorit Muhamet Haxhaj.