Sot, në Qendrën e Kulturës “Jehona e Dukagjinit” në Klinë, me nderime të larta kombëtare, u shënuar jubileu i 20-vjetorit të rënies heroike të dëshmorit të kombit, Farku Elezi, i rënë dy dekada më parë për të mbetur i përjetësuar në altarin e kombit.
Në këtë homazh përkujtimi, përpos kryetarit të Komunës së Klinës, Zenun Elezaj dhe nënkryetarit, Besim Hoti, morën pjesë familjarë të dëshmorit të kombit, Faruk Elezi, deputeti i Parlamentit të Republikës së Kosovës, Lah Ibrahimi, përfaqësues të shoqatave të Dala nga Lufta e UÇK-së, përfaqësues të Policisë së Kosovës, familje të dëshmorëve dhe martirëve të Kosovës, përfaqësues të Bashkësisë Islame në Klinë, pjesëtarë të FSK-së, qytetarë nga Klina dhe mjedise të tjera etj.
Kryetari i Komunës së Klinës, prof. Dr. Zenun Elezi, duke folur për vlerat dhe virtytet e dëshmorit të kombit Faruk Elezi, theksoi se Faruk Elezi ishte shembull për të gjithë ata që besuan në Ushtrinë Çlirimtare të Kosovës dhe lirinë e këtij vendi. “Faruku ra për Tokën e Kosovës, sot, 20 vjet më parë, ra në lulen e rinisë, për të mos vdekur kurrë! Populli shqiptar në rrugën historike të hartës së gjeografisë sonë etnike, derdhi lumenj gjaku për liri, pavarësi dhe bashkim kombëtar. Një histori kaq e gjatë, një histori e larë me gjakun e bijave dhe bijve më të shtrenjtë të kombit tonë, e kishte kthyer në ëndërr ditën e lirisë dhe të pavarësisë së Kosovës. Janë të shumtë ata idealistë të kombit tonë që dhanë jetën në altarin e Atdheut. Shumë prej tyre me aktet heroike u bënë simbol i fitores së përkushtuar me shekuj; u bënë pishtarë të së ardhmes kombëtare; u bënë ideatorët dhe projektuesit e lirisë e të pavarësisë. Aktet e tyre heroike kanë lënë gjurmë të thella e të pashlyeshme edhe në historinë tonë më të re, në historinë e shumë stinëve të përgjakshme të Kosovës së martirizuar, ka pohuar kryetari Elezaj i cili në vazhdim është shprehur se liria mbi qiellin e Kosovës rrezaton nga gjaku i të rënëve, duke vlerësuar më tej kryetari Elezaj se ata që më armë në dorë luftuan pa u trembur dhe pa kursyer gjakun e tyre, vunë heroizmin e tyre në themelet e kësaj lirie. “Ata që dhanë jetën për lirinë e Kosovës, i treguan kombit, i treguan botës, se sa i shtrenjtë është atdheu, sa me vlerë është liria, për ta gëzuar qoftë edhe nën dheun e atdheut. Emri i dëshmorit të kombit Faruk Elezi, paraqet një personalitet mjaft të nderuar dhe të veçantë, i cili për asnjë çast nuk është shkëputur nga veprimtaria e tij atdhetare dhe patriotike. Jeta dhe vepra e tij lartësojnë sakrificën dhe vizionin për lirinë e këtij populli, duke mbetur një monument kujtimi për të gjithë brezat që vijnë. Emri i tij do të jetë simbol i rënies ballaballë me pushtuesin gjakësor; simbol i luftëtarit të denjë për lirinë e Kosovës. Emri i tij sot është i nderuar në vendlindjen e tij, në rreth, Kosovë dhe gjitha hapësirat shqiptare, sepse ky emër është pjesë e pandarë e historisë, të tashmes dhe të ardhmes së popullit shqiptar. Dëshmori i kombit Faruk Elezi sikur kishte lindur që t’i kushtohej me tërë qenien e vet shpirtërore e fizike çështjes sonë kombëtare dhe nuk kursente asgjë nga vetja për fitoren e saj. Edhe pse me moshë ishte tejet i njomë, mirëpo me përkushtim dhe ideal ndaj kombit dhe atdheut të tij ishte mjaft pjekur, sepse dinte të çmonte çka është liria për popullin e tij. Ai ishte i gatshëm kurdoherë që të jetë aty ku mbrohej interesi ynë kombëtar. Dinte ta urrente armikun dhe shërbëtorët e tij, si dhe t’i nderojë shokët, miqtë e vërtetë dhe të gjitha ata idealistë që kishin bërë dhe po bënin angazhim të çmueshëm në interes të kauzës kombëtare dhe të atdheut. Ai ishte i vetëdijshëm për sfidat dhe pengesat, mirëpo ideali i tij i thyente të gjitha vështirësitë dhe sfidat që në ballafaqim më armikun ishin të mëdha. Ky vit i përkujtimit të dëshmorëve të kombit, e në këtë rast edhe i dëshmorit Faruk Elezi, është më kuptimplotë se sa vitet e pritjeve të gjata që i lamë pas, sepse në njërën anë shënon dhjetëvjetorin e Pavarësisë së Kosovës, gjithashtu edhe 20-vjetorin e rënies së këtij dëshmori të kombit, me gjakun e të cilit u shpalos Harta e Lirisë së Kosovës”, ka konstatuar kryetari Elezaj, i cili më tej është shprehur se ky dëshmor lirie u vra në rrugën e lirisë, në rrugën e jetës…” Andaj, ka pohuar kryetari Elezaj, ne të gjallët përkulemi me pietetin më të lartë për jetë e mote para veprave heroike të Farukut dhe bashkidealistëve të tij dëshmorë të kombit, dhe u mbetemi borxh që figurat dhe veprat e tyre t’i kujtojmë dhe rikujtojmë, po ashtu edhe mesazhet e porositë që na i kanë lënë për ndërtimin dhe forcimin e shtyllave të shtetit të Kosovës, t’i çojmë në vend. “Faruku, edhe pas ka vitesh të rënies së tij dhe i largimit të tij nga ne, ai gjithnjë ndodhet midis nesh; është flijimi që e mban të gjallë dhe të përjetësuar, gjithnjë kujtohet dhe flitet me respekt të thellë për të. Të pavdekshëm e bëri jeta dhe vepra e tij, e skalitur me shkronjat e arta me epitetin më lartësues dhe më vlerësues, dëshmor i kombit dhe i atdheut të tij. Për këto ideale ishte edhe martirizimi i Farukut”,, është shprehur ndër të tjera kryetari Elezaj.
