Në kuadër të procesit të hartimit të Kornizës Afatmesme Buxhetore (KAB) për periudhën 2026–2028, Komuna e Klinës ka mbajtur dëgjimin e gjashtë me radhë në shkollën e mesme të ulët “Tre Dëshmorët” në fshatin Jashanicë.
Në këtë takim morën pjesë kryetari i Komunës, Zenun Elezaj, drejtori i Financave dhe Zhvillimit Ekonomik, Enver Berisha, drejtori i Urbanizmit, Enver Berisha, drejtori i Shërbimeve Publike, Qendrim Millaku, dhe drejtori i Inspektoratit, Faruk Smajli. Takimi u zhvillua me pjesëmarrjen aktive të banorëve nga fshatrat Jashanicë, Pogragjë, Dush i Vogël, Resnik, Jelloc, Gjurgjevik i Madh, Ujmirë dhe Doberdol.
Drejtori i Financave, Enver Berisha, prezantoi Kornizën Afatmesme Buxhetore 2026–2028, duke theksuar kategoritë ekonomike dhe projektet me prioritet ndër vite. Ai bëri të ditur se buxheti i planifikuar për vitin 2026 është 16,338,898.00 €, ndërsa vlerësimi për vitin 2027 është 17,130,331.00 €, dhe për vitin 2028 është 17,939,537.00 €. Ndërkohë, buxheti aktual për vitin 2025 kap vlerën prej 16,168,653.00 €.
Në fjalën e tij, kryetari Elezaj u ndal te projektet që janë në fazën fillestare të realizimit, si dhe ato që pritet të përfundojnë deri në fund të këtij viti. Ai nënvizoi rëndësinë e bashkëpunimit me qytetarët në procesin e planifikimit buxhetor, duke siguruar që prioritetet e komunitetit të jenë pjesë përbërëse e politikave zhvillimore të komunës.
Banorët shpalosën nevojat e zonave të tyre dhe si prioritet renditën: mirëmbajtjen e varrezave të fshatit, ndërtimin e urës, rindërtimin e rrugës kryesore, si dhe trotuarët.
Dëgjimet buxhetore do të vazhdojnë edhe në bashkësi të tjera lokale, me synim përfshirjen e gjerë të qytetarëve në vendimmarrje dhe transparencën në menaxhimin e fondeve publike. Nga nesër, më datë 11 qershor, organizohen dëgjimet sipas agjendës së mëposhtme:
Shtëpia e Kulturës “Jehona e Dukagjinit”, me temë “Prioritetet e grave dhe të rinjve të Komunës së Klinës”, më 11.06.2025, ora 16:00.
SHFMU “Atë Shtjefën Gjeçovi”, në fshatin Zllakuqan, me banorët e fshatrave Zllakuqan, Berkovë, Ranoc, Leskoc, Nagllavë, Dranashiq, Stupë, Rudicë, Jagodë, Videjë, Krushevë e Madhe dhe Budisalc, më 11.06.2025, ora 17:00.
Për të gjithë të interesuarit e tjerë që nuk patën mundësi të jenë pjesë e këtyre takimeve, komentet apo kërkesat mund t’i përcjellin edhe në mënyrë të shkruar nëpërmjet postës elektronike deri më datë 24 qershor, në adresën:
Vlora Tafili, email: vlora.tafili@rks-gov.net
Melihate Behramaj, email:melihate.behramaj@rks-gov.net
Draft-Korniza Afatmesme Buxhetore 2026-2028:
https://kline.rks-gov.net/…/634-Klina-DRAFT-KAB-2026…
Agjenda:
https://kline.rks-gov.net/…/Njoftim-per-Degjimet…
