Për nder të 20 vjetorit të rënies heroike të dëshmorit-komandantit te Shtabit Lokal në Shtupel, Avni Ali Zhabota, u mbajt akademi përkujtimore nën nderim të jetës dhe veprës së tij.
Kjo akademi përkujtimore u mbajt në Qendrën Kulturës “JEHONA E DUKAGJINIT” ku prezent ishin kryetari i Komunës, Prof. Dr. Zenun Elezaj, Nënkryetari Besim Hoti, dhe përfaqësues tjerë të strukturave të qeverisjes komunale, familjarë të familjes Zhabota, përfaqësues të policisë së Kosovës në Klinë, qytetarë të Klinës dhe lokaliteteve të saj etj.
Për figurën e heroit Avni Zhabota në këtë akademi me një fjalë rasti është prezantuar Kryetari i Komunës së Klinës, Prof. Dr.Zenun Elezaj.
Të nderuar pjesëmarrës të këtij homazhi përkujtimor, me rastin e jubileut të njëzetvjetorit të rënies heroike të mesuesit – dëshmor, Avni Zhabota, i cili , pikërisht, në ditën e sotme, para njëzet vjetësh ra për lirinë e Kosovës për të mbetur pishtar i dijes, pishtar i lirisë dhe i së ardhmes së Kosovës.
Pjesëmarrës të nderuar,
Njëzet vjet më parë, më 4 gusht 1998, kur Kosovës dhe popullit shqiptar të saj i kanosej një hekatombë e re nga pasardhësit e ardhacakëve të dikurshëm të Karpateve, në fshatin Açarevë, në këtë vend të rezistencës kombëtare, në një luftë krejtësisht të pabarabartë me makinerinë luftarake të ushtrisë serbe ra heroikisht dëshmori i kombit, mësuesi i brezave shqiptarë, Avni Zhabota, veprën e të cilit sot po përkujtojmë.
Shumë vjet, por edhe pak ditë para aktit të flijimit, mësues Avniu, pishtar i arsimit kombëtar në Shkollën e Shtupelit, që sot me krenari mban emrin e tij, me përkushtim dhe profesionalizëm ua kishte mësuar nxënësve të tij shkrimin dhe këndimin e gjuhës shqipe, historinë e lavdishme të popullit tonë të lashtë, dhe nuk vonoi, sepse kishte vendosur, e kishte bërë mendjen top, hyri edhe vetë në histori, u bë pjesë historisë më të re të Kosovës.
Sot, brezat e rinj, të cilët marrin dituri në shkollën që mban emrin e dëshmorit Avni Zhabota, figura, vepra, mësimet e këtij mësuesi dëshmor tek këta breza të arnues së vendit tonë, rrezaton dritë frymëzimi dhe udhërrëfimi për të mësuar sa më shumë dhe në të ardhmen për t’i shërbyer vendit të tyre dhe kombit të tyre përgjithësisht.
Nxënësit e kësaj shkolle, mësuesit dhe gjithë populli i kësaj zone, i Klinës, dhe gjithë Kosovës krenohet me veprën sublime të dëshmorit mësues- Avni Zhabota.
Klinas të dashur,
Akti heroik i Avni Zhabotës ishte veprim plotësisht i vetëdijshëm, veprim i një njeriu që luftën për liri e kishte filluar shumë kohë më parë, duke e zhvilluar atë në shumë fronte: si mësimdhënës, si veprimtar, si atdhetar… Flijimi i 4 gushtit ishte një akt i një njeriu me vetëdije të lartë kombëtare e politike, akti i një veprimtari e atdhetari të vërtetë, i cili ishte thellësisht i bindur se liria nuk fitohet ndryshe, pos me gjak e sakrifica sublime.
Rruga që ndiqte Avniu ishte rrugë e shenj të, të cilën e vazhduan edhe mijëra të rinj dhe të reja, anekënd atdheut.
E ç’mund të bënte tjetër ky njeri në orën e tij të fundit? Asgjë, përpos të flijohej për idealin e Kosovës dhe të popullit të tij, si akti më sublim për Avniun idealist dhe gjithë idealistët të tjerë, të cilët dhanë provimin e jetës: vdiqën për lirinë e Kosovës për t’u përjetësuar; për t’u bërë edhe vetë pjesë e historisë së saj.
Avni Zhabota, Njeiu, Mësuesi, Atdhetari, dhe Luftëtari i Lirisë, u vra më 4 gusht 1998, duke kurorëzuar përpjekjet dhe synimet e tij për të mirën e atdheut. Ishte një kurorëzim madhështor që i dha epitetin e dëshmorit, epitetin që e bën të pavdekshëm, të paharruar dhe të nderuar përgjithmonë nga ne dhe nga brezat që do të vijnë.
Idealet dhe sakrifica sublime e dëshmorit të kombit Avni Zhabota, do të shërbejnë si udhërrëfyese dhe shtegtime të gjata për realizimin e idealeve të mëdha…
Lavdi e përjetshme për Mësuesin – Dëshmor, Avni Zhabota!
Lavdi për gjithë dëshmorët e lirisë së Kosovës!
