Në varrezat e fshatit Rixhevë të Komunës së Klinës, u shënua njëvjetori i vdekjes së veteranit të Luftës së UÇK-së dhe ish-punëtorit të Komunës, së Klinës, zyrtarit të Gjendjes Civile në Gllarevë, z. Skënder Morina, i cili një vit më parë u nda nga jeta për të mbetur mes nesh emër nderi dhe krenarie.
Në këtë homazh përkujtimor, përpos familjarëve, të afërmve, bashkëluftëtarëve dhe bashkëqytetarëve të tij, mori pjesë edhe kryetari i Komunës, Prof. Dr. Zenun Elezaj, me bashkëpunëtorët e tij.
.Në fjalën e tij, Kryetari Elezaj theksoi se jemi tubuar sot këtu, me ndjenjën e dhimbjes dhe të kujtimit të pashlyeshëm për t’i bërë homazh dhe përkujtuar birin tuaj, veteranin e UÇK-së dhe ish-punëtorin e Gjendjes Civile në Komunën e Klinës, i cili u nda nga ne, pikërisht në ditën e sotme, një vit më parë për të mbetur kujtim i përhershëm në mendjen dhe zemrat tona.”Emri i Skënderit, bashkë me të familjes së tij, është i lidhur pothuajse me të gjitha proceset që kanë të bëjnë me punën, angazhimin dhe çështjen shoqërore dhe kombëtare, me luftën, me lirinë dhe Pavarësinë e Kosovës. Jemi sot këtu pranë familjes së tij, për ta nderuar figurën dhe veprën e Skënderit, për t’iu falënderuar për gjithë punën dhe angazhimin që ka bërë gjatë jetës së tij në të mirë të familjes, shoqërisë kosovare dhe kombit të tij përgjithësisht. I ndjeri Skënder Morina, vite më të mira të jetës, vullnetin dhe përkushtimin më të madh ia fali popullit të tij, duke iu gjendur pranë për t’iu ndihmuar dhe kryer shërbimet të nevojshme administrative, por edhe punë të tjera të nevojshme për jetën. Unë nuk e kam pasur fatin që të punoj me Skënderin, megjithatë nga kolegët e tij kam dëgjuar vetëm fjalë të mira për të, si një punëtor i vyeshëm, i nderuar dhe i respektuar nga të gjitha ata që kanë punuar me të. Në kohën e luftës së popullit tonë nën emblemën e Ushtrisë Çlirimtare të Kosovës, Skënderi u lidh me luftën për çlirim kombëtar, krejt familja e tij u bë bazë ë fortë e UÇK-së, shtëpia e tij tashmë ishte shtëpi e ushtarëve, strehë e ngrohtë dhe çerdhe e lirisë. Pra, maksimalisht dha kontribut për luftën dhe për lirinë e Atdheut. Në fund, e nderuara familje Morina, më lejoni t’ju shpreh dhimbjen time personale dhe dhimbjen e kolegëve të Skënderit nga administrata komunale e Komunës se Klinës, ku ai e dha kontributin qytetar dhe profesional derisa u pensionua. Si ngushëllim më i mirë për Skënderin tuaj dhe tonin le të na mbetet vepra e tij e sendërtuar me vite, fryma dhe përkushtimi i tij deri në frymën e fundit të jetës: për angazhimin e tij profesional, për Atdheun dhe për Lirinë e tij. Qoftë i përjetshëm kujtimi për jetën dhe veprën e tij! I qoftë i lehtë dheu i Republikës së Kosovës!” është shprehur ndër të tjera Kryetari Elezaj.
