Në Shkollën Fillore të Mesme të Ulët “Esad Mekuli” në Caravik, sot është bërë dorëzim-pranimi i kabinetit të fizikës, kimisë, matematikës dhe gjeografisë, donacion nga KFOR-i cili ka një vlerë afër 11 000 euro.
Me këtë rast, drejtori i Arsimit, Qemajl Sejdija, falënderoi KFOR-in italian, kolonelin Rocco Mundo, për këtë donacion shumë të rëndësishëm e të nevojshëm për këtë shkollë.
Drejtori Sejdija theksoi se pajisja e shkollave me kabinete ofron kushte më të përshtatshme për zhvillimin e procesit mësimor dhe ndikon në rritjen e cilësisë në arsim. Ai, po ashtu, tha se komuna e Klinës po angazhohet vazhdimisht që nëpërmjet projekteve të financuara nga buxheti komunal dhe bashkëpunimeve e donacioneve me institucione të ndryshme të sigurojnë kushte e pajisje të duhura për shkollat.
Koloneli Rocco Mundo theksoi se edukimi dhe arsimimi është shumë i rëndësishëm dhe shtoi se KFORI-i është i vendosur që të mbështesë institucionet në fushën e arsimit.
Ky donacion është siguruar si rezultat i kërkesës së Komunës së Klinës për KFOR-in dhe bashkëpunimit të mirë që kemi si komunë.
