Shkolla fillore e mesme e ulët, “Isa Boletini”, në fshatin Drenoc të komunës së Klinës, sot, me disa aktivitete kulturoro-edukative si dhe program të pasur artistik, ka shënuar ditën e shkollës.
Në këtë shënim të ditës së kësaj shkolle, të pranishëm ishin kryetari i Komunës së Klinës, Prof. Dr. Zenun Elezaj i shoqëruar nga drejtori i Inspektoratit në Komunën e Klinës, z. Faruk Smajli, drejtori i shkollës, z. Adnan Beqiri dhe bashkëpunëtorë të tjerë, përfaqësues të KFOR-it dhe Policisë së Kosovës, mësues, nxënës të kësaj shkolle dhe qytetarë.
Para të pranishmëve, kryetari i Komunës së Klinës, Prof. Dr. Zenun Elezaj, në fjalën e tij uroi nxënësit dhe mësimdhënësit për shënimin e ditës së shkollës.
“Jam i lumtur që gjendem sot, bashkë me ju, në festim të ditës së shkollës, ku kremtohet 90 vjetori i ekzistencës së saj e që mban emrin e heroit, Isa Boletini. Ne si institucione lokale do të punojmë vazhdimisht që të krijojmë një infrastrukturë të përshtatshme që të ngrisim cilësinë në mësimnxënie dhe të krijojmë kushte të mira për nxënësit për më shumë aktivitet e kreativitet.
Urime dita e shkollës!”, tha ndër të tjera kryetari Elezaj.
Gjithashtu drejtoria e shkollës ndau mirënjohje për punën dhe kontributin e dhënë mësuesve me rastin e pensionimit të tyre si dhe nxënësve të cilët kanë treguar suksese të larta në sport dhe gara të ndryshme.
