Nën përkujdesjen e Kryetarit të Komunës së Klinës, Zenun Elezaj, u mbajt ceremonia e rivarrimit të tre qytetarëve të identifikuar pas gati 27 vitesh nga Masakra e Kralanit: Masar Ymer Dushi, Bali Pajazit Gashi dhe Fadil Shaban Elezaj.
Eshtrat e tyre, të gjetura në varrezën masive në Bishtazhin të Gjakovës, u rivarrosën në Kompleksin Memorial “Kodra e Kuqe” në Grabanicë, pranë dëshmorëve dhe martirëve të lirisë. Me këtë akt, familjet e tyre më në fund kanë një vend prehjeje për më të dashurit.
Masakra e Kralanit dhe krimet e tjera të kryera gjatë luftës mbeten plagë të hapura. Nga 140 persona të pagjetur nga komuna, 66 janë identifikuar si të vrarë, ndërsa për 74 të tjerë ende nuk dihet fati.
