Komuna e Klinës është e para që është vizituar në vazhdën e takimeve të presidentes së Kosovës, zonjës Atifete Jahjaga , në rrafshin e Dukagjinit .
Presidentja e Republikës së Kosovës, zonja Atifete Jahjaga, e shoqëruar nga drejtuesit e Odës Ekonomike të Kosovës, Odës Ekonomik Amerikane dhe Odës Ekonomike Gjermane, e kanë vizituar komunën e Klinës , ku qëllimi i kësaj vizite ka qenë zhvillimi ekonomik në komunat e Kosovës.
Gjatë takimit me kryetarin e komunës, z. Sokol Bashota , Presidentja Jahjaga tha:
Në bashkëpunim me Odën Ekonomike të Kosovës, Odën Ekonomike Amerikane dhe Odën Ekonomike Gjermane, kam vendosur të fillojmë vizitat nëpër komuna të Kosovës për të nxitur një dialog të nevojshëm dhe të munguar për zhvillimin ekonomik, punësimin dhe investimet e huaja. Është tashmë e qartë që zhvillimi ynë ekonomik varet nga krijimi i një klime të favorshme investimi, pa pengesa administrative, me sundim të fortë të ligjit dhe konkurrencë të barabartë.
Vizita ime së bashku me Odat ekonomike ka për qëllim adresimin e drejtpërdrejtë të këtyre pengesave për të ndihmuar bizneset që të depërtojnë në Kosovë, në përpjekje për të ulur papunësinë dhe për të ngritur kualitetin e jetës në Kosovë.
Kryetari Bashota , duke e falënderuar presidenten Jahjaga për vizitë dhe për iniciativën e marr , ka thënë se : Ky takim ka për qellim zhvillimin ekonomik të komunës së Klinës , dhe disponimi i komunës sonë është që sa më shumë të kemi investime në komunën e Klinës dhe se komuna e Klinës, është e gatshme çdo here për bashkëpunim, po ashtu kryetari Bashota e ka propozuar një punëtori të përbashkët , ku do të mund të diskutoheshin shumë gjera ku mendohet se ka ngecje . Presidentja e ka përkrahur këtë propozim të kryetari Bashota , ku ka thënë se kjo punëtori do të organizohet dhe se do të udhëhiqet nga ajo, pra nga presidentja Jahjaga.
Gjatë këtij takimi fjalën e kanë marr edhe Safet Gërxhaliu, kryetar i Odës Ekonomike të Kosovës, Arian Zeka, kryetar i Odës Ekonomike Amerikane, Albert Matoshi, drejtor ekzekutiv i Odës Ekonomike Gjermane.
