Komuna e Klinës ka mbajtur dje dëgjimin e dhjetë buxhetor për Kornizën Afatmesme Buxhetore 2025-2027, në sallën e Kuvendit Komunal Klinë, në ora 17:00, me banorët e lagjeve të qytetit, duke përmbyllur kështu procesin e dëgjimeve publike për KAB.
Të pranishëm në takim ishin kryetari i Komunës së Klinës, Prof. Dr. Zenun Elezaj, drejtorë të drejtorive, anëtarë të grupit punues si dhe banorë të lagjeve të qytetit.
Kryetari Elezaj në fjalën e tij hyrëse ka prezantuar para qytetarëve projektet të cilat janë planifikuar dhe do të realizohen në periudhën 2025-2027.
Ai gjithashtu ka prezantuar në detaje ndarjen buxhetore në kategori të buxhetit, duke shpjeguar sesi do të shpërndahen fondet dhe investimet për të siguruar një zhvillim të qëndrueshëm dhe të drejtë për të gjithë qytetarët.
Kryetari gjithashtu nënvizoi rëndësinë e përfshirjes së qytetarëve në procesin e hartimit të buxhetit dhe dëgjimin e zërit të tyre për të planifikuar projekte që i shërbejnë interesave të tyre.
Gjithashtu në diskutim të hapur qytetarët që ishin prezentë në takim patën mundësinë të paraqesin kërkesat dhe nevojat e tyre në lidhje me zbatimin e projekteve në lokalitetet e tyre.
Gjatë këtij takimi u diskutuan projekte të cilat ishin propozime nga qytetarët të cilat do të trajtohen me prioritet nga Komuna.
Komuna e Klinës është e përkushtuar të sigurojë dëgjime të hapura dhe të dobishme për qytetarët, duke u përqendruar në transparencë dhe llogaridhënie.
Procesi i dëgjimeve publike buxhetore është një element kyç në përfshirjen e komunitetit dhe përmirësimin e shërbimeve publike. Këto dëgjime janë shumë të rëndësishme për të siguruar që buxheti i ardhshëm reflekton nevojat dhe kërkesat e qytetarëve.
Në ditët në vijim Komuna e Klinës do të dalë me njoftimin dhe agjendën e dëgjimeve buxhetore për buxhetin e vitit 2025.
