Tashmë, përgatitjet për Festivalin Folklorik mbarëkombëtar “I Këndojmë Lirisë”, që mbahet në Klinë më 6, 7 dhe 8 qershor të këtij viti, po zhvillohen me ritëm të shpejtuar. Në mbledhjen e Këshillit Organizativ të festivalit, këto përgatitje u vlerësuan të suksesshme.
Drejtori komunal i Kulturës dhe Sportit, Dritan Bardheci, njoftoi se procedurat e tenderimit janë në përfundim e sipër, sa i përket akomodimit, ushqimit, binës dhe të gjitha çështjeve të tjera.
Binak Syla, drejtor i Administratës të komunës, u shpreh se komuna e Klinës edhe sivjet e ka mbështetur financiarisht festivalin, në mënyrë që festivali të jetë sa më mirë dhe cilësor.
Drejtori i festivalit, Alban Gashi, u përqendrua tek puna e grupeve punuese të festivalit dhe sjelljen grupeve artistike, rapsodëve e valltarëve nga të gjitha trojet shqiptare si dhe për informimin me kohë për të gjitha çështjeve te festivalit. Njëkohësisht, u fol edhe për ditën e parë të nisjes së festivalit në Çabiq, vendlindjen e Mujë Krasniqit – Kapuçit. Fatmir Krasniqi, nga Drejtoria Artistike e Festivalit, theksoi se janë duke u bërë kontaktet me ansamblet dhe grupet artistike që do të performojnë gjatë tre netëve të festivalit.
Hajdin Balaj, kryetar i OVL-së, kërkoi që organizatat e luftës të kenë tretman adekuat, sepse, siç tha ai, festivali është festival i UÇK-së. Aktivitetet e festivalit pasqyrohen edhe në gazetën “Lyra”.
Festivali mbahet nën përkujdesjen e kryetarit të Komunës, prof.dr. Zenun Elezaj.
