Në sallën e konferencave të komunës së Klinës është mbajtur takimi i Këshillit organizativ të festivalit folklorik mbarëkombëtar “I këndojmë Lirisë 2024”, i cili sivjet shënon 22 vjetorin e rrugëtimit të tij, festival ky që i kushtohet komandantit të shquar të UÇK-së, Mujë Krasniqit-Kapuçit.
Në takim është diskutuar mbi përgatitjet, pasi që edhe nisja e festivalit po afron, të gjitha procedurat janë kryer për skenë, binë, zërim, akomodim e të tjera.
Drejtori për Kulturë, Rini dhe Sport, Driton Bardheci, theksoi se sivjet përgatitjet për mbajtjen e festivalit kanë filluar me kohë e që për publikun do të shpaloset program tejet i pasur kulturor, artistik me karakter tradicional.
Ndërsa, drejtori i festivalit, Alban Gashi, tha se gjithçka rreth organizimit po ecën mirë, tanimë drejtoria artistike e festivalit që bënë përzgjedhjen e grupeve, rapsodëve e valltarëve, ka konfirmuar që pjesëmarrja do të jetë e madhe dhe publikut do t’i prezantohen vlerat tona kombëtare kulturore me këngë e valle.
Festivali do të nisë me 6 qershor te kulla muze e Mujë Krasniqit, në fshatin Çabiq, në vendlindjen e Mujë Krasniqit.
Shumë shpejtë do të publikohet edhe agjenda si dhe performuesit.
