Në kuadër të aktiviteteve për rritjen e vetëdijes dhe përgatitjes për situata emergjente, Drejtoria e Shërbimeve Publike – Njësia e Zjarrfikësve e Komunës së Klinës ka mbajtur një takim informues në Shkollën Fillore “Ismet Rraci” me nxënësit dhe stafin mësimdhënës.
Ky takim kishte për qëllim promovimin e masave mbrojtëse dhe parandalimin e zjarreve, si dhe rritjen e njohurive për mënyrat e reagimit në raste urgjente.
Në fillim të takimit, specialistët e zjarrfikësve bënë një prezantim të shkurtër mbi mbrojtjen nga zjarri dhe masat parandaluese që duhet të merren në jetën e përditshme për të minimizuar rreziqet. Ata shpjeguan rëndësinë e ruajtjes së sigurisë dhe mënyrën e veprimit në rast të shpërthimit të një zjarri.
Pas këtij prezantimi, u paraqitën dhe demonstruan pajisjet që përdoren nga zjarrfikësit, si: aparatet zjarrfikëse të dorës, gërshërët dhe pistoni për prerjen e metaleve në rast aksidenti. Nxënësit dhe stafi patën mundësinë t’i shohin nga afër këto pajisje dhe të kuptojnë funksionin e tyre në situata emergjente.
Pjesa më e rëndësishme e aktivitetit ishte demonstrimi praktik i shuarjes së zjarrit, i cili u realizua në oborrin e shkollës. Me ndihmën e pajisjeve të prezantuara, u tregua se si duhet vepruar në rast të një zjarri dhe si mund të përdoren këto mjete për ta vënë situatën nën kontroll. Ky aktivitet praktik pati një ndikim të madh, pasi ndihmoi nxënësit dhe stafin të jenë më të përgatitur dhe të dinë si të reagojnë në rast zjarri.
Ky takim kontribuoi në rritjen e ndërgjegjësimit për sigurinë dhe forcoi bashkëpunimin ndërmjet institucioneve arsimore dhe shërbimeve publike për përgatitjen ndaj situatave të jashtëzakonshme.
Drejtoria e Shërbimeve Publike, ashtu edhe stafi i shkollës “Ismet Rraci”, shprehën falënderime të sinqerta për Njësinë e Zjarrfikësve të Komunës së Klinës, të cilët janë gjithmonë në gatishmëri për të siguruar qytetarët dhe për të mbrojtur jetën dhe pasuritë e tyre në raste emergjente. Angazhimi i tyre i palodhur dhe profesionalizmi në çdo situatë janë shembull i jashtëzakonshëm i përkushtimit dhe kujdesit për mirëqenien e komunitetit. Ne jemi thellësisht mirënjohës për kontributin dhe mbështetjen e vazhdueshme që ofroni për të parandaluar pasojat e mundshme të zjarreve dhe për të siguruar një mjedis të sigurt për të gjithë.
