Reagim i Zyrës së kryetarit të Komunës së Klinës, Sokol Bashota, përkitazi me shkrimin “Në Klinë prona publike tjetërsohet për interesa private”, të botuar në Portalin koha. net, të datës 11.11.2014
Për hir informimit objektiv të opinionit, jemi të detyruar të reagojmë njoftimit, përkatësisht shkrimit të Lëvizjes “Vetëvendosje” – dega në Klinë, me titull: “Prona publike tjetërsohet për interesa private”, të botuar në portalin koha.net, të datës 11.11.2014.
Në njoftimin, përkatësisht shkrimin në fjalë, Lëvizja Vetëvendosje në vend që të shërbehet në fakte dhe argumente shërbehen në dezinformata dhe të pavërteta sa tendencioze aq edhe qëllimkëqija.
Artikullshkruesit, fillojnë me konstatimin: Njoftojmë qytetarët e Komunës së Klinës dhe opinionit e gjerë publik se qeverisja lokale PDK-AAK në punimet e Asamblesë komunale të datës 26.9.2014, ka votuar kundër interesave të qytetarëve duke tjetërsuar pronën publike private. Prona publike te Ura e Gurit është dhënë për ndërtimin e tri objekteve të larta private”. Në shkrimin – njoftimin e shkruar nga ta, në vijim mes tjerash thuhet se përveç interesit publike duke tjetërsuar pronën publike, edhe procesi i marrjes së këtij vendimi është i jashtëligjshëm, ngase një anëtar i Asamblesë komunale ka konflikt interesi në këtë rast. Gjatë shpërndarjes së këtij njoftimi tek qytetarët, përderisa ishin vendosur edhe dy pano pranë objektit të Komunës me të njëjtin tekst, pati provokime nga punëtorët e zyrës së Kryetarit të Komunës. Më pas, në të njëjtin vend erdhën edhe forcat policore, të prirë nga komandanti Ramiz Marmullaku, i cili kërkoi nga aktivistët që të largohen nga aty për shkak se është ankuar Komuna. i njëjti ka qenë i ashpër me aktivistët, duke shprehur edhe tendencë për përdorim të forcës nëse nuk zbatohet urdhri i tij”, thuhet ndër të tjera në njoftimin –njoftimin e Lëvizjes “Vetëvendosje”.
Prandaj, me qëllim të informimit të drejtë japim këto fakte:
1. Është shumë e vërtetë që Asambleja Komunale më datën 26.9. 2014 ka votuar më shumicë absolute të votave me qëllim që në atë hapësirë për të cilën flasin të ndërtohet një shesh, po ashtu parashihet edhe ndërtimi i tri ndërtesave të reja me interes publiko-privat. Ideja e këtij plani ka për qëllim rregullimin,përkatësisht ndryshimin e imazhit të qytetit tonë në atë pjesë. Të gjithë e dimë që ajo pjesë hyrëse për në qytet është në gjendje të mjerueshme. Ndërtesat e vjetra po e dëmtojnë pamjen e qytetit. Është e nevojshme për ta ndryshuar atë pamje të shëmtuar që mbretëron në atë pjesë të qytetit tonë. Ngastrat të asaj hapësire janë ngastra në pronësi të Komunës, titullarë të tjerë nuk kanë, Komuna është titullar e vetme e atyre ngastrave, të tjerët që nuk kanë dokumentacion janë ilegalë, janë vetëm shfrytëzues. Rreth kësaj çështjeje më shumë përkushtim janë angazhuar edhe dy drejtoritë komunale, Drejtoria për Urbanizëm dhe Mbrojtje të Mjedisit, po ashtu edhe Drejtoria për Kadastër dhe Pronës në Klinë. Me siguri, sikur të mos ishte interesi i Planit Strategjik Zhvillimor, nuk do të kishim ndërmarrë në realizimin e këtij plani. Ngastrat kadastrale që u potencuan më lart, numër 523/0,627 dhe 526/1), janë në pronësi të Komunës dhe të askujt tjetër.
2. Sa i përket çështjes së konfliktit të interesit të një anëtari të Kuvendit të Komunës, ne për ketë çështje nuk kemi njohuri që ndonjëri nga anëtarët e Kuvendit të Komunës ka konflikt interesi me këtë rast.
3. Duke penguar rrugën në hyrje të objektit të administratës komunale, VV vendosi dy pano të formatit të madh. Kryetari i kësaj lëvizjeje në Klinë, Skënder Merturi bashkë me një nga anëtarët e kryesisë së këtij subjekti, shpalosen një “Njoftim” me gjithsej 24 rreshta me 58 gabime gjuhësore dhe disa shpifje ordinere. Aktiviteti i tyre nuk zgjati më shumë se 10 minuta. Ata u detyruan nga organet kompetente të policisë dhe inspektorëve që ta lëvizin vendqëndrimin, pasi që po e pengonin direkt procesin e punës së administratës. Si duket ndryshimi i “vendshitjes së gënjeshtrave” nuk iu pëlqeu të sipërpërmendurve, ndërkaq si rrjedhoje “ikën në shpi!” Por, në orët e mbrëmjes , në portalin Koha.net, publikohet i njëjti “Njoftim”, duke ia hequr disa rreshta të fundit e duke i shtuar disa gënjeshtra më shumë. Gënjeshtra këto të zakonshme: “ Punëtorët e Zyrës së Kryetarit, kanë provokuar” etj. Për informimin e publikut dhe të gjithë ata që kanë lexuar këtë shkrim të VV në portalin koha.net, Zyra e Kryetarit sqaron se asnjë lloj provokimi nuk ka pasur as Skënder Merturi e as Fadil Destani nga punëtorët e Zyrës së Kryetarit, apo punëtorët e administratës së Klinës. Punëtori i Zyrës së Kryetarit, miqësisht ka sugjeruar që të lëvizin disa metra nga hyrja kryesore në objekt dhe, po ashtu, ta lekturojnë shkrimin, meqenëse kanë provuar të shkruajnë në gjuhën shqipe. Nëse kjo, Skënder Merturit dhe VV i duket “provokim” , ne nuk kemi çfarë t’iu themi tjetër përveç asaj që Edi Rama ia tha Vuçiqit :” Çuditem se si provokoheni nga e vërteta”. Pra, me këtë rast, një fenomen tjetër që prezantuan aktivistët e “Vetëvendosjes”, përmes këtij “Njoftimi” dëshmuan analfabetizmin e tyre ligjor, gjuhësor, dhe logjik.
Ishin këto vetëm disa nga faktet të cilat i prezantojmë opinionit të vërtetën për aq sa është thënë në shkrimin – njoftimin në fjalë. Lexuesit le ta gjykojnë vetë, por assesi nuk është i dobishëm keqpërdorimi i faqeve të këtij portali.
