Tashmë përgatitjet për organizimin e Festivalit Folklorik “I Këndojmë Lirisë”, në Klinë, që mbahet më 6, 7 dhe 8 qershor të këtij viti, kanë përfunduar. Në detaje dihet edhe agjenda e festivalit, që nga hapja e Festivalit në Çabiq, në vendlindjen e Komandant Mujë Krasniqi-Kapuçi, e deri te manifestimi konkurrues në sheshin “Mujë Krasniqi” në Klinë, që nga dita e parë e deri te mbyllja e festivalit. Hapja bëhet te Kulla muze në Çabiq, për të vazhduar në mbrëmje në sheshin Mujë Krasniqi, ku bina do të jetë ndër më të mirat e deritashme.
Këto të dhëna, në Këshillin Organizativ i paraqiti drejtori i Drejtorisë Komunale të Kulturës, Rinisë dhe Sportit, Driton Bardheci. Ai shtoi se nga e hëna do të vendosen flamujt, banerat dhe mjetet tjera dekorative, ndërkaq që nga e mërkura sheshi Mujë Krasniqi do të mbyllet për qarkullim të automjeteve. Në anën tjetër, edhe akomodimi për pjesëmarrësit në festival që vijnë jashtë Kosovës është siguruar. Sivjet është edicioni i 23-të me radhë i festivalit dhe nis në Çabiq, në vendlindjen e Mujë Krasniqit- Kapuçit, njërit nga komandantët më të shquar të UÇK-së.
Në hapjen solemne të festivalit para Kullës muze, më këngë e valle do të paraqiten grupe artistësh, rapsodë e instrumentistë nga të gjitha trojet shqiptare. Në Çabiq shtrohet edhe “Sofra e Çabiqit”, me ushqime tradicionale.
Alban Gashi, drejtor i Festivalit, theksoi se bina do të vendoset tri ditë para fillimit të festivalit dhe çdo gjë do të testohet, duke filluar nga zërimi si dhe një video kasetë për Mujë Krasniqin dhe Komandantin legjendar, Adem Jashari.
Fatmir Berisha, nga Drejtoria Artistike, njoftoi për pjesëmarrësit në festival që do të jenë nga të gjitha trojet shqiptare. Gjithashtu dihen se cilat grupe e ansamble do të paraqiten në natën e parë, të dytë dhe të tretë, që do të jenë nga ora 11:00.
Edhe sivjet mbahet Panairi me produkte vendore, që e organizon Drejtoria Komunale e Bujqësisë, ku me prodhimet e tyre do të paraqiten individë e firma të njohura nga Kosova.
Drejtori i kësaj Drejtorie, Lorenc Marleku duke treguar për pjesëmarrësit në këtë panair, tha se deri tash janë paraqitur rreth 15 pjesëmarrës.
Hajdin Balaj, kryetar i OVL-së në Klinë, tha se sivjet edhe organizatat e dala nga lufta kanë bërë përgatitjet e veçanta për festivalin. Në festival do të jenë të pranishëm edhe krerët e organizatave të luftës në nivel qendror, por edhe të ftuar të tjerë të njohur për kontributin e tyre për çlirimin e vendit.
Enver Maloku, zëdhënës i festivalit, foli për aspektet e informimit si dhe për gazetën “Lyra”, në të cilën paraqiten kronikat e festivalit, hapja e festivalit, shënime, reportazhe, biseda e intervista me personalitete të njohura nga fusha e artit dhe e folklorit.
