Kryetari Bashota ka falënderuar Ministrin e Arsimit, z. Ramë Buja, për vendimin që ka marrë për pavarësimin dhe emërtimin e shkollës së Valljakut. Në shkollën e Valljakut u mbajt një manifestim i pasur kulturor me rastin e pavarësimit dhe të emërtimit të kësaj shkolle me emrin “Dëshmorët”, ashtu siç ka vendosur MASHT-i, në përputhje me rekomandimin e DKA-së së Komunës së Klinës dhe me kërkesën e Këshillit Drejtues të shkollës dhe të komunitetit në përgjithësi. Për historikun e shkollës foli përgjegjësi, z. Enver Berisha. Në këtë manifestim të rëndësishëm për komunitetin e kësaj ane mori pjesë edhe Kryetari Komunës së Klinës, z. Sokol Bashota, i cili më së shumti ka kontribuar që kjo shkollë të pavarësohet dhe të emërtohet me emrin e ri. Në fjalën e tij të rastit Kryetari Bashota tha ndër të tjera se kjo ditë është ditë shumë e shënuar, sepse nuk ka gjë më të shenjtë sesa të tubohemi për nder të festës së shkollës dhe nuk ka gjë më të shenjtë sesa të punojmë për zhvillimin e shkollës shqipe, ashtu siç ka punuar dhe po punon pushteti lokal në Komunën e Klinës dhe udhëheqja komunale. Kjo shkollë prej sot ka zot shtëpie, prandaj prej ditës së sotme kjo shkollë do të ofrojë shërbime shumë më të mira, shërbime shumë më cilësore për nxënësit e kësaj shkolle dhe për të gjithë të interesuarit e tjerë. Kryetari Bashota ka përmendur dhe ka çmuar kontributin për liri të kësaj ane e cila ka dhënë disa dëshmorë të kombit, të cilët me emrin e tyre të skalitur në këtë shkollë do të jenë edhe një frymëzim më shumë, edhe një motiv më shumë për të arritur rezultate edhe më të larta. Dhe në fund, Kryetari Bashota ka falënderuar Ministrin e Arsimit, z. Ramë Buja, për vendimin që ka marrë për pavarësimin dhe emërtimin e shkollës së Valljakut. Kryetari Bashota i ka dorëzuar përgjegjësit të deritashëm, tash u.d.i drejtorit, z. Enver Berisha, vendimet e MASHT-it për pavarësimin dhe për emërtimin e shkollës së Valljakut me emrtin “Dëshmorët”.
Ndërsa drejtori i DKA-së, z. Hajdin Morina, theksoi rëndësinë që ka pavarësimi i një shkolle dhe kontributin e Kryetarit Bashota, jo vetëm për pavarësimin e kësaj shkolle, por për të gjitha projektet e realizuara në sektorin e arsimit në Komunën e Klinës. Prej datës 4 nëntor Komuna e Klinës ka 17 shkolla amë fillore, nga 15 sa kishte deri më tash, dhe kjo tregon se Qeveria e Republikës së Kosovës dhe pushteti lokal në Klinë, nën udhëheqjen e Kryetarit Sokol Bashota, arsimin e kanë vënë prioritet mbi të gjitha prioritetet, sepse pa zhvillim të arsimit nuk ka kurrfarë zhvillimi tjetër në jetën ekonomike dhe shoqërore, ka përfunduar Morina.
Ramiz Berisha në emër të fshatit Valljak ka dhënë mirënjohje për Kryetarin Bashota, për Ministrin Ramë Buja dhe për DKA-në në Klinë, për kontributin e tyre për pavarësimin dhe emërtimin e shkollës së Valljakut.
Përpos shkollës së Valljakut, me Vendim të MASHT-it dhe kontributin e Kryetarit Bashota dhe të DKA-së, është pavarësuar dhe është emërtuar me emrin “Dëshmorët e Kombit” edhe shkolla e Çabiqit, për të cilën do të organizohet në ditët e ardhshme një manifestim solemn kulturor.
