Morinë, 5 tetor
Dëshmorët e kombit, të Komunës së Klinës, Mujë Krasniqi, Arben Haliti, Ali Krasniqi, Gani Zogaj dhe Xhavit Kamberaj, të cilët përfaqësojnë figurat më madhore dhe më të ndritura të luftës së UÇK-së, u rivarrosen në Kompleksin 
Memorial në Morinë.
Pra, po në këtë ditë të shënuar, u bë inaugurim i Kompleksit Memorial të Dëshmorëve të Kombit, ku njëherësh u rivarrosen Komandantë të Zonës Operative të Drenicës, Mujë Krasniqi, Ilaz Kodra, Abendin Rexha, bashkë me dëshmorë të tjerë.
Në këtë ngjarje të rëndësishme i pranishëm ishte edhe kryetari i Komunës së Klinës, Prof. Dr. Zenun Elezaj.
Ky moment i rëndësishëm dëshmon faktin se e tashmja ndërtohet mbi të djeshmen, prandaj Liria dhe Pavarësia e Kosovës u lindën mbi sakrificat mbinjerëzore të së djeshmes, mbi gjakun dhe mundin e shumë dëshmorëve dhe të figurave të Kombit tonë heroik. Liria dhe Pavarësia e Republikës së Kosovës u lind mbi themelet e patundshme që shtroi thellë në tokën tonë lufta e lavdishme e Ushtrisë Çlirimtare të Kosovës, gjaku i këtyre bijve, gjaku i mijëra dëshmorëve të kombit, të cilët e stolisën me gjak dhe me përmendore tokën e bekuar të Kosovës.
