Në Çabiq të Klinës, në vendlindjen e komandantit të shquar të UÇK-së, Mujë Krasniqit, pranë Kullës muze, solemnisht nisi edicioni i 23-të i Festivalit folklorik “I këndojmë lirisë”, për të vazhduar për tri netë më radhë, më 6, 7 e 8 qershor në sheshin Mujë Krasniqi në qytetin e Klinës.
Më këtë rast merrnin pjesë personalitete të shquara të jetës politike e ushtarake të Kosovës, bashkëluftëtarë të Mujës si dhe qytetarë të shumtë.
Festivalin e hapi kryetari Komunës së Klinës, Prof.Dr. Zenun Elezaj, i cili, pasi që u ka shpreh mirëseardhje të gjithë të pranishmëve që kishin ardhur në Çabiq, në edicionin e 23-të të Festivalit Folklorik Mbarëkombëtar “I Këndojmë Lirisë”, i cili tash e 23 vjet mbahet për të nderuar luftën heroike të komandant Mujë Krasniqit, “Kapuçit”, dëshmorëve e heronjve të kombit, gjaku i të cilëve u bë themel i lirisë e pavarësisë së Republikës së Kosovës, Prof.Dr. Zenun Elezaj tha:
“Sot, këtu në Çabiqin e komandant “Kapuçit”, në vendin ku Muja lindi më 6 qershor 1967, u rrit e u edukua në frymë atdhetare e patriotike e për tu bërë një̈ ndër projektuesit e Ushtrisë Çlirimtare të Kosovës dhe një̈ ndër luftëtarët më të zotë në luftën për liri e pavarësi, pikërisht në ditëlindjen e tij të 58-të, bashkë me ju, bashkëluftëtarë të Mujës, bashkëveprimtarë e bashkëvendës, po hapim edhe një edicion tjetër të Festivalit Folklorik Mbarëkombëtar “I këndojmë lirisë”, ndërsa festën që po nisim këtu do ta vijojmë për tri netë me radhë në Klinë, me kujtime dhe nderime të përhershme për luftën e UÇK-së. Ky edicion i këtij festival zëmadh do të mbahet mend edhe për një arsye tjetër të rëndësishme. Këtë vit në mesin tonë mungon fizikisht një grua e cila e përkundër sakrificave e dhimbjeve të mëdha qëndroi gjithmonë si një heroinë e vërtetë.
Ky është edicioni i parë që mbahet pa prezencën e Shehide Selimi Krasniqit, nënë e dy dëshmorëve të kombit, Mujë e Ali Krasniqit. Ajo sot nuk është fizikisht në mesin tonë, por ne do ta kujtojmë gjithmonë si grua e fortë, atdhetare, nënë heroinë e simbol i gruas shqiptare”, theksoi Elezaj. Ai pastaj, u shpreh se Festivali “I këndojmë lirisë” është festival i kujtesës sonë kombëtare, festival i vlerave kombëtare, festival i traditave tona kombëtare.
Njëjtë sikur Muja që i këndonte heronjve, luftërave, rapsodët me këngë, me çifteli, me sharki do ta kujtojnë Mujën, Alinë, dëshmorët e heronjtë e kombit, luftën e lavdishme të UÇK-së. Festivali “I këndojmë lirisë” ka karakter garues. Në këtë festival jepen 15 çmime. Çmimi kryesor është “Mujë Krasniqi”.
Ish-kryeministri i Kosovës, Ramush Haradinaj, bashkëluftëtar i Mujës, tha se bashkëluftëtarët na bashkojnë në vendet e shenjta, siç është Prekazi, Çabiqi e vende të tjera. Porosinë e luftetarëve do ta çojnë vend. “Në këto manifestime nuk i harrojmë edhe bashkëluftëtarët tanë, ndaj të cilëve po zhvillohet procesi gjyqësor në Hagë. Atje do të dëshmohet pafajësia e ish-presidentit Kosovës Hashim Thaçi, ish kryparlamentarëve, Kadri Veselit e Jakup Krasniqit, Rexhep Selimit e të tjerëve, sepse lufta e jonë ishte e drejtë, që ne nuk e harrojmë asnjëherë ndihmën e Amerikës. Porosinë e luftës nuk do ta harrojmë”, tha Haradinaj. Ai foli edhe për ngërçin aktual për konstituimin e Kuvendit të Kosovës , të cilin, tha se do ta tejkalojnë.
Në emër të fshatit Çabiq, ka folur Prend Buzhala, i cili fillimisht tha se Festivali “I Këndojmë Lirisë” është pjesë e festave të Klinës dhe Çabiq, pjesë e kalendarit kombëtar e kulturor.
Ky fshat, ndër festivale i pret me moton “Mirë se ju ka pru Zoti. Shpia asht e mikut dhe e Zotit”, ashtu siç është shtruar kjo sofër te kjo Kullë, nga e cila, dikur dëgjohej Kënga e Mujës dhe fluturonin Pëllumbat e Bardhë të Mujës, simbole paqeje, pastërtie dhe vigjilence. Nëpër festivale rrugëve të këtij fshati kanë defiluar e vallëzuar valltarë nga të gjitha trojet etnike. Që dy dekada ende do të jehojnë vargjet e një këngë Kreshtat e Kosovës kanë marrë ngjyrë të kuqe.
“Çabiqi dha tre dëshmorë, Komandantin Mujë Krasniqi dhe të vëllain e Mujës, Ali Krasniqi, si dhe Muhamet Gashin, ndërkohe që sivjet u varros profesori i zhdukur gjatë luftës Adem Buzhala dhe vëllai i tij Ismeti, akoma i zhdukur. Çabiqi ka treguar gatishmëri për sakrifica, ka dhënë njerëz të artit e të krijimtarisë popullore e poetike, gjithnjë ka reflektuar tolerancën ndër vëllazërore fetare, traditë nga të parët duke ruajtur lidhjet e gjakut më rrënjë të përbashkëta familjare.
Në festivalin “I këndojmë Lirisë” këndohet dhe vallëzohet me shpirt. Ky festival na tubon si në një familje të madhe, ku secili vjen me historinë e vet. Kënga folklorike është zemra e lirisë tonë. Ajo është që na mbanë të bashkuar, është gjuha e shpirtit tonë që nuk harron kurrë se kush jemi dhe nga vijmë. Le të qëndrojmë pranë njëri – tjetrit, si familje e madhe , e bashkuar nga kënga dhe tradita. Sofra na lidhë. Na bën një, është dritarja e zemrës”, ka thënë Buzhala. Pastaj u dha një program i pasur artistik me këngë për Mujën, Beqën, Aliun, e të tjerë si dhe valle hodhën vallatrët e AKV “Jehona e Dukagjinit” nga Klina. Në mbrëmje në Sheshin “Mujë Krasniqi” në Klinë vazhdon festivali me grupet, këngëtarët, valltarët , pjesëmarrës të festivalit. Poashtu do të jetë i hapur edhe panairi me produkte. Festivali zgjatë tri ditë dhe ka karakter garues.
