Në Sheshin “Mujë Krasniqi” në Klinë, mbrëmë në natën e parë konkurruese në Festivalin Folklorik mbarëkombëtar “I Këndojmë Lirisë”, jehoi kënga dhe vallja folklorike. Aty pranë shtatores së Komandantit Mujë Krasniqit-Kapuçit, në binën e ngritur enkas për këtë ngjarje folklorike, në skenë u paraqitën këngëtarë, valltarë e instrumentistë nga trevat e Kosovës. Ndërkaq, para nisjes së festivalit, parakaluan grupe e valltarë pjesëmarrës. Edicionin e 23-të e hapi i pari Komunës së Klinës, kryetari Prof.Dr.Zenun Elezaj, i cili në fjalën përshëndetëse u dëshiroi mirëseardhje e suksese të gjithë festivalistëve që marrin pjesë në këtë manifestim folklorik. Në skenë, jashtë konkurrencës u ngjitën këngëtarët dhe valltarët e AKV ”Jehona e Dukagjinit”.
Festivali Folklorik mbahet nënë përkujdesjen e kryetarit të Komunës së Klinës, Prof.Dr.Zenun Elezaj. Para nisjes së konkurrimit për të pranishmit u shfaq një video incizim me pamje të luftës dhe të këngëve të Mujë Krasniqit, me regji të Alban Gashit e me muzikë të zgjedhur nga Arjon Gashi. Moderatore e festivalit është Fatjona Gashi.
Në natën e parë konkurruese, të parët që u paraqitën para publikut ishin këngëtarët dhe valltarët e SHKA “Malësori” nga Gjonaj i Hasit. Ata besnik, si kurdoherë i mbesin këngës dhe valles nga treva e Hasit. Vallja hasjanë ishte një valle karakteristike, për veshjen unikate që i veçon nga të gjitha trojet shqiptare dhe për mënyrën hedhjes së valles nga valltaret e kësaj shoqërie artistike. Pastaj përformuan edhe grupe, rapsodë e valltarë nga treva të ndryshme të Kosovës, si SHKA “Opoja” nga Opoja e Dragashit, me , vallet e burrave dhe të vajzave të kësaj treve. AKV “Karadaku” nga Gjilani u paraqit me këngën “Thërret Prizreni mori Shkodër”. AKV “Bilbilat e Pashtrikut”, kësaj here kishin ardhur me një valle instrumentale dhe me një këngë për Mujë Krasniqin. Kënduan edhe rapsodët nga Mleçani. AKV “Selman Kadria” nga Istogu, si zakonisht paraqitjen e tyre e fillojnë me vallen e Podgurit, duke vazhduar me performanca që askush tjetër nuk i ka, me melodi me gjeth, si dhe këngë folklorike të përcjella me lahutë.
NATËN E PARË E MBYLLI shk “Karadaku” nga Gjilani. Interesimi për ta përcjellë festivalin nga qytetarët e Klinës dhe më gjerë ishte i madh.
