Kryetari i Komunës së Klinës, Prof. Dr. Zenun Elezaj, me rastin e festës tradicionale të Kurban Bajramit të gjithë qytetarëve të besimit islam i’u është drejtuar me këtë mesazh urimi: “Të nderuar qytetarë të besimit islam! Si qytetar i parë i Komunës së Klinës, përkatësisht Kryetar i Komunës së Klinës, përzemërsisht ju shpreh urimet më të thella me rastin e festës së shenjtë të Kurban Bajramit, ditë, e cila shënon një moment solemn dhe tepër festiv për çdo qytetarë të besimit islam.
Në këtë ditë të madhërishme, lutjet, falënderimet dhe mirënjohjet zënë vend në çdo tryezë të çdo besimtari, ndërsa virtytet e bamirësisë, të mirësisë, të dhembshurisë dhe dashurisë për njerëzit, sidomos tek ata më në nevojë, ringjallet tek secili qytetar solidar dhe bamirës.
Të dashur bashkëqytetarë,Festa e sotme e Kurban Bajramit është një pjesë integrale e trashëgimisë shpirtërore të popullit tonë, ku me tolerancën dhe harmoninë tradicionale ndërfetare që na karakterizon në shekuj, ne i përcjellim njëri-tjetrit urimet më të ngrohta për mbarësi, mirësi e begati në familje dhe në gjithë aspektet e jetës. Ky është një tregues i përkushtimit tonë për vlerat më të larta njerëzore, çfarë na fisnikëron si popull, promovon mirëkuptimin dhe bashkëpunimin në shoqëri, si dhe konsolidon përpjekjet tona të përbashkëta për një të ardhme të ndritur, për një të ardhme, të cilën ne e shohim të projektuar si pjesë e familjes së madhe europiane, tek e cila afrohemi dinjitetshëm me vlera dhe trashëgimi kombëtare e kulturore përgjithësisht
Uroj që në familjet tuaja të keni shëndet, gëzim, paqe, begati e mirëqenie!
Gëzuar dhe me shumë fat Festën e Kurban Bajramit!”- thuhet në urimin e Kryetarit Elezaj.
