Këshilli Komunal për Sigurinë e Bashkësive (KKSB) në komunën e Klinës mbajti sot takimin e II-të të rregullt për vitin 2015, vlerëson nivelin e lartë të sigurisë në komunë.
Përveç temave të rregullta mbi sigurinë e bashkësive të komunës së Klinës, KKSB-ja debatoj edhe lidhur me rastet-incidentet në muajt e fundit, me theks të veçantë të plaçkitjeve dhe zjarrvënieve tek disa familje te komunitetit Serb. Në fjalën hyrëse, Zt. Enver Berisha, Nënkryetar I Komunës së Klinës, shprehu shqetësimin e jo vetëm të institucionit që përfaqëson por edhe të të gjithë qytetarëve të Klinës lidhur me këto zhvillime të cilët në një mënyrë apo tjetër japin një pamje të cilën ne nuk e dëshirojmë. Ne si Komunë kemi dënuar fuqishëm këto incidente. Për fat të mirë, nga të gjitha analizat tona si dhe nga raportet e organeve të Policisë, del që asnjë nga këto raste nuk janë me prapavijë etnike. Zt. Berisha, tutje falënderoj angazhimin e pjesëtarëve të Policisë ( rajonale dhe lokale) në suksesin e treguar për lokalizimin dhe kapjen e keqbërësve të përfshirë në rastet e fundit.
Policia e Kosovës, mori falënderime edhe nga Shefi i Zyrës Komunale për Kthim dhe Bashkësi, Zt. Milorad Sharkoviq si dhe nga pjesëmarrësit tjerë të takimit.
Pikë tjetër e takimit ishte edhe gjendja lidhur qentë endacak në territorin e komunës së Klinës. Përfaqësuesi i strehimores së qenve endacak, Zt. Izet Berisha, informoj të pranishmit mbi zhvillimet lidhur me këtë temë shumë të ndjeshme. Ai tha se që nga Shtatori i vitit 2014 që kur është arritur marrëveshja me Komunën e Klinës, ata kanë arritur të trajtojnë rreth 250 qen endacak, gjithmonë në pajtim me ligjin përkatës. Nga ana tjetër, disa anëtarë të KKSB-së kërkuan më shumë angazhim të të gjithëve në mënyrë që numri i qenve endacak të zvogëlohet deri në minimum, me çka do të krijoheshin kushte më të mira sigurie, posaçërisht të fëmijëve.
