Në Qendrën e Angazhimit të Komunitetit (QAK), ish-qendra rinore “Ardhmëria”, është mbajtur takimi i dytë i konsultimit publik për Draft- Planin Lokal të Veprimit për Barazinë Gjinore 2024 – 2026. Takimin e udhëhoqi nënkryetarja e komunës, znj. Marqe Tanushi -Selmanaj, ku të pranishëm ishin edhe zyrtarja për Barazinë Gjinore, znj. Vitore Shala, përfaqësues nga stacioni i policisë në Klinë, përfaqësues nga Drejtoria e Kulturës, gra përfaqësuese të institucioneve si dhe qytetarë.
Nënkryetarja Selmanaj, theksoi se Plani Lokal i Veprimit për Barazinë Gjinore (PLVBGJ) 2024 – 2026 u përgatit nga Komuna Klinë me mbështetjen e UN Women Kosovë në kuadër të zbatimit të projektit “Gender Equality Facility” (GEF) me fonde të Bashkimit Evropian, si mjeti kryesor i zbatimit të angazhimeve publike për barazinë gjinore dhe i cili ka për qëllim zbatimin dhe promovimin e të drejtës së barazisë.
Njoftojmë të gjithë të interesuarit, se kanë ende mundësi të njihen dhe të japin komentet e tyre mbi këtë dokument përgjatë procesit të konsultimit publik, propozimet e juaja lidhur me këtë akt mund t’i dorëzoni me shkrim në Zyrën për Barazi Gjinore, kati III, krahu i majtë, zyra e dytë, gjithashtu, në mënyrë elektronike te zyrtarët: Vitore Shala, email: vitore.shala@rks-gov.net dhe Vlora Tafili, email: vlora.tafili@rks-gov.net, deri me datën 24.05.2024.
