Komuna e Klinës, përkatësisht Drejtoria e Arsimit, në bashkëpunim me shkollat e qytetit, organizoi fazën e parë të testimit në nivel shkolle, ku u testuan të gjithë nxënësit e klasave të IX-ta, si dhe fazën e dytë në nivel komunal të Olimpiadës së Gjuhës Shqipe, me 55 nxënës. Ky aktivitet, i cili u mbajt në hapësirat e sallës së Kuvendit, kishte për qëllim promovimin e aftësive dhe talentit të nxënësve në fushën e gjuhës shqipe.
Në këtë garë morën pjesë të gjitha shkollat e Klinës me gjithsej 55 përfaqësues. Nxënësit që treguan rezultate të shkëlqyera në nivel komunal dhe përfaqësuan Komunën e Klinës në nivel shtetëror ishin: Leona Myrtaj, Diellza Racaj, Erua Raci, Rrezarta Prenaj, Era Gashi, Klejda Bashota dhe Arba Bojaj.
Ndërkaq, një lajm i veçantë dhe i gëzueshëm është fakti që nxënësja e shkollës “Tre Dëshmorët” në Jashanicë, Leona Myrtaj, e cila tregoi një rezultat të shkëlqyer në fazën e tretë të testimit në nivel shtetëror, do të përfaqësojë Komunën e Klinës në garat kombëtare që do të mbahen në Tiranë. Ky është një sukses i jashtëzakonshëm për Leonën dhe për gjithë komunitetin arsimor të Klinës.
Komuna e Klinës është gjithmonë në mbështetje të talenteve dhe angazhimit të rinisë për zhvillimin e aftësive dhe dijes në fusha të ndryshme. Ne jemi krenarë për nxënësit tanë dhe do të vazhdojmë të mbështesim çdo iniciativë që kontribuon në zhvillimin e arsimit dhe të talenteve të rinj.
