Komuna e Klinës ka filluar dëgjimet buxhetore për Draft-Buxhetin e vitit 2025 në fshatin Grabanicë, me banorët e fshatrave Grabanicë, Dollovë, Bokshiq, Qeskovë, Zajm, Këpuz, Deiq dhe fshatrat e tjera përreth, i cili është mbajtur në ambientet e shkollës së mesme të ulët “Azem Bejta”, me fillim nga ora 18:30, ku morën pjesë 28 persona.
Të pranishëm ishin kryetari i Komunës së Klinës, Prof. Dr. Zenun Elezaj, drejtori i Financave dhe Zhvillimit Ekonomik, Enver Berisha, drejtori i Arsimit, Qemajl Sejdija, drejtori i Inspektoratit, Faruk Smajli, drejtori për Kulturë, Rini dhe Sport, Driton Bardheci, këshilltari i kuvendit komunal, Armend Beqiri, anëtarë të grupit punues si dhe banorë të zonave të lartcekura.
Prezantimi i buxhetit është bërë në tabelat e mençura, po ashtu, pjesëmarrësve iu është siguruar materiali edhe në kopje fizike së bashku me agjendën. Gjithashtu, është bërë edhe një përmbledhje për ecurinë e dëgjimeve buxhetore të vitit të kaluar lidhur me projektet e reja dhe ndryshime buxhetore.
Kryetari i Komunës, Prof. Dr. Zenun Elezaj, në fjalën e tij tha: “Është e rëndësishme që dëgjimet buxhetore të përfshijnë zërin e çdo qytetari, pasi kështu sigurojmë që prioritetet e komunitetit të reflektohen në buxhetin final. Ne jemi të përkushtuar që të bashkëpunojmë me ju për të realizuar projektet që përmirësojnë jetën në komunën tonë.”
Ndërsa, drejtori i Financave dhe Zhvillimit Ekonomik, Enver Berisha, theksoi: “Ky proces buxhetor është një mundësi për të dëgjuar nga afër nevojat dhe shqetësimet e qytetarëve. Jemi këtu për të siguruar që fondet publike të shpërndahen në mënyrë transparente dhe me prioritetet që ju i keni identifikuar.”
Në këtë takim, banorët e zonave të lartpërmendura vunë në pah disa nga prioritetet e tyre kryesore, duke përfshirë vazhdimin e trotuarit me ndriçim dhe asfaltimin e disa rrugicave.
Ky dëgjim është vetëm një hap në procesin e hartimit të buxhetit për vitin 2025 dhe Komuna e Klinës do të vazhdojë të bashkëpunojë me qytetarët për të siguruar që çdo vendim të jetë në përputhje me nevojat e komunitetit.
Nesër, komuna e Klinës do të vazhdojë me agjendën e dëgjimeve:
•Dëgjim publik me banorët e komunës së Klinës, me fokus banorët e fshatrave Volljakë dhe Sferkë, datë 16.08.2024, ora 17:00, në SHFM “Dëshmorët”, Volljakë.
•Dëgjim publik me banorët e komunës së Klinës, me fokus banorët e fshatit Përçevë, datë 16.08.2024, ora 18:30, në SHFMU “Xhafer Gashi”, Përçevë.
