Çmimi – Vepra më e mirë letrare , ju nda shkrimtarit Mikel Gojani.
Organizuar nga Drejtoria për Kulturë Rini e Sport, nën përkujdesjen e kryetarit të Komunës së Klinës, z. Sokol Bashota, u mbajt manifestimi tradicional letrar dhe kulturor “Ora e Tahir Deskut”, që mbahet çdo vit me rastin e ditëlindjes së këtij shkrimtari, gazetari, publicist dhe reporter të luftës së UÇK-së.
Në këtë manifestim përpos kryetarit të Komunës së Klinës dhe strukturave të tjera politike të komunës, morën pjesë edhe shumë krijues të tjerë nga Prishtina, Peja, Gjakova, Malisheva, Skënderaj dhe diaspora. Në fjalën e rastit, duke folur për shëmbëlltyrën e Tahir Deskut, kryetari i Komunës së Klinës, z. Sokol Bashota, theksoi se ky homazh letrar e kulturor për poetin dhe luftëtarin e lirisë Tahir Desku është shprehje e ndjenjës së respektit tuaj që kemi për vlerat tona letrare dhe ato luftarake. “Për shumë njerëz të penës, ideali për lirinë e popullit ka qenë ndjenjë e mbëltuar në shpirtin e tyre, siç ka qenë edhe në shpirtin e poetit dhe reporterit të luftës së UÇK-së Tahir Desku, emrin e të cilit sot në vargje po e përkujtojmë me pietet. Tahir Desku i takon një plejade të shkëlqyer të krijuesve tanë, për të cilët liria dhe atdhedashuria ishin frymëzim dhe ideal i tyre. Vargjet e kësaj plejade krijuesish u bënë zgjim i vetëdijes së gjeneratës së këtij populli, i cili pati fatin ta jetojë këtë kohë, kur bëheshin përpjekjet e fundit që një herë dhe përgjithmonë ky popull të përjetojë mëngjesin e lirisë kombëtare”, pohoi kryetari Bashota.
Për jetën dhe veprimtarinë e tij letrare, publicistike e gazetareske të Tahir Deskut, foli shkrimtari Prend Buzhala, i cili çmoi lartë vlerat e Tahir Deskut në këto fusha.
Në këtë manifestim, sikur çdo vit kur ndahet edhe çmimi prestigjioz për veprën më të mirë letrare. Juria letrare në përbërje: Prend Buzhala, Hajdin Morina dhe Idriz Berisha për këtë vit Çmimin “Ora e Tahir Deskut” i ndanë romanit të fundit të titulluar “Rrugëtim nën zë”, të autorit Mikel Gojani. Arsyetimin për Çmimin e prezantoi kryetari i jurisë letrare, Prend Buzhala. Ndërkaq, çmimin letrar “Ora e Tahir Deskut” laureatit të këtij çmimi i ndau kryetari i Komunës, z. Sokol Bashota.
Një pjesë e këtij manifestimi letrar e kulturor ishte konceptuar në promovimin e veprave të Tahir Deskut, të titulluar: “Kam mundur të vdes (Vepra), botuar nga Shtëpia Botuese OLYMP – Prishtinë. Rreth këtyre veprave një prezantim e bëri z. Liridon Zeka, në cilësinë e botuesit.
Në vazhdim u mbajt Ora letrare, ku me poezitë e tyre u prezantuan shumë krijues letrar. Poezitë të prezantuara kishin karakter vlerësues. Pas leximit të poezive, juria në përbërje: Ramadan Mehmeti, Sherif Bllaca dhe Ismet Krasniqi, ndanë këtë shpërblime: Vendi i parë, poetit pejan Sejdi Berisha, vendi i dytë, Halil Haxhosaj, vendi i tretë, Franë Tanushi, ndërsa shpërblimi për poetin stimulus, shpërblimi iu nda poetit të ri, Florian Krasniqi.
