Në kuadër të aktiviteteve për shënimin e 18 Qershorit – Ditës së Çlirimit të Klinës, në Shtëpinë e Kulturës “Jehona e Dukagjinit” është mbajtur një koncert solemn nën tingujt e muzikës klasike shqiptare.
Ky aktivitet kulturor u organizua në bashkëpunim me grupin artistik “Besiana & Të Mirët e Kombit”, duke sjellë para publikut klinas koncertin “NË LEGJENDA”, i cili u prit me shumë interes dhe duartrokitje të ngrohta.
Nën interpretimin magjepsës të artistëve të mirënjohur: Besiana Mehmedi (mezosoprano), Mariana Leka (soprano) dhe Rudina Ciko (në piano), u ekzekutua një program i përzgjedhur muzikor me këngët më të bukura shqiptare, të cilat ruhen si pasuri e trashëgimisë sonë kulturore. I ftuar nderi ishte edhe mjeshtri i madh Zhani Cako.
Koncerti ishte një nderim i denjë për të gjithë ata që dhanë jetën për lirinë e vendit dhe kontribuan në rrugën e shtetndërtimit, duke përçuar mesazhin e respektit, krenarisë dhe mirënjohjes për sakrificën e tyre.
Në vazhdën e aktiviteteve, para objektit të komunës është realizuar edhe një program artistik me këngë dhe valle nga Ansambli i Këngëve dhe Valleve “Jehona e Dukagjinit”.
Me këngë u paraqitën: Shaban Demaj, Fatmir Berisha, Ismet Demaj, Valentin Laci, Valbona Krasniqi, Ali Gashi, Daut Gashi, Mustaf Krasniqi, si dhe Brikena Berisha.
