Në vazhdën e aktiviteteve dhe takimeve që kryetari i Komunës, Zenun Elezaj, është duke i zhvilluar nëpër lokalitete të komunës së Klinës, me qëllim të bashkëbisedimit me qytetarët rreth njohjes me kërkesat dhe prioritetet që kanë, kryetari Elezaj, është takuar me banorët e fshatit Rastokë dhe Qeskovë.
Në këto takime me banorët fshatit Rastokë dhe Qeskovë, banorët e këtyre fshatrave shprehën shqetësimet dhe kërkesat e tyre për përmirësim të infrastrukturës në fshat, rrjetit të kanalizimit, rregullimin dhe asfaltimin e rrugëve, rinovimin e rrjetit elektrik etj.
Në bashkëbisedim me banorët e fshatit Rastokë Kryetari u njoftua me nevojën që banorët e këtij lokaliteti kanë për rregullimin e rrjetit të kanalizimit, sepse mungesa e këtij rrjeti ka krijuar një ambient të ndotur në këtë fshat. Me këtë rast, banorët e këtij fshati para Kryetarit prezantuan edhe nevojën e asfaltimit të rrugës në gjithë fshatin.
Gjatë këtij aktiviteti, kryetari Elezaj po ashtu vizitoi edhe fshatin Qeskovë, me ç’rast banorët e këtij fshati shprehën nevojën dhe kërkesën për rregullimin e rrjetit të kanalizimit, po ashtu edhe mundësinë e riparimit të rrjetit elektrik në këtë fshat, pasi që rrjeti ekzistues ka kapacitete të dobëta. Nga banorët e këtij fshati rrodhi edhe kërkesa edhe për riparimin e rrugëve me zhavorr, përkatësisht përfundimin e rrugëve me asfalt.
Banorëve të të dy këtyre fshatrave kryetari Elezaj u premtoi se qeverisja komunale do të jetë e përkushtuar për t’u dalë në ndihmë, jo vetëm qytetarëve të këtyre dy fshatrave, por në të gjitha lokalitetet të kësaj komune, duke shfrytëzuar mundësitë buxhetore që ka Komuna e Klinës.
