Të dashur mësuese dhe mësues,
Ndihem i nderuar dhe tepër i lumtur që t’u drejtohem me urimin më të sinqertë, me rastin festës së 7 – Marsit, festës që nderon punën tuaj kaq fisnike dhe të dashur për të gjithë.
Mësues të dashur, të Komunës së Klinës, të Kosovës dhe kudo që ndodheni, brenda dhe jashtë vendit, respekt dhe mirënjohje për gjithë punën dhe angazhimin tuaj, sakrificën e mundin që keni bërë dhe po bëni, në profesionin tuaj shumë fisnik dhe tepër dinjitoz, për sakrificën e bërë në ndriçimin e kësaj rruge, siç është ajo e dijes dhe e diturisë kombëtare. Njohuritë që po ju shpërndani brezave tanë të rinj, do të na shpijnë përpara e do ta konsolidojë të ardhmen e suksesshme të gjeneratës së re, një gjeneratë që me formimin e saj do të projektojë një qytetari me vlera demokratike, universale dhe të standardeve evropiane.
Pietet deri në përkulje për gjithë ata dëshmorë të arsimit shqip dhe lirisë së kombit, të cilët edhe jetën e tyre e dhanë në rrugën e shkronjave dhe lirisë së këtij populli që sot po gëzon.
Lejomëni ta mbyll urimin tim me thënien e rilindësit të shquar, Naim Frashëri: “Dhe drita e diturisë përpara do të na shpjerë”. E, pra, të dashur mësuese e mësues, së bashku ta ndriçojmë sa më shumë atë dritë, pasi ky është detyrimi ynë njerëzor e patriotik ndaj popullit tonë, atdheut dhe brezave tanë të rinj.
Gëzuar festën tuaj, 7 Marsin.
