Kryetari i Komunës së Klinës, z. Sokol Bashota, ka reaguar ndaj disa rasteve të fundit të grabitjeve të pronave të komunitetit serb në këtë komunë.
Më 17.5.2014 (e hënë), në fshatin Grapc të komunës së Klinës, persona të paidentifikuar një pjesëtari të komunitetit serb, të familjes Magiq, i kanë vjedhur një traktor. Po ashtu, edhe në fshatin Binxhë, nga njerëz të paidentifikuar, një pjesëtari të komunitetit serb i kanë shkatërruar seren e ndërtuar për kultivimin e prodhimeve të perimeve. Sera ishte pronë e familjes Donqiq.
Po ashtu, në orët e hershme të mëngjesit, përkatësisht diku rreth orës 5 të ditës së hëne (më 18.5.2015), disa persona kanë thyer dyert e një shtëpie dhe kanë hyrë brenda në familjen serbe të quajtur Koniq, me ç’rast u kanë grabitur një shumë të parave prej 100 euro, po ashtu edhe një shumë të dinarëve serb.
Me të gjitha rastet në fjalë janë duke u marrë policia e Klinës po ashtu edhe ajo rajonale dhe janë në kërkim të akterëve.
Këto raste të ulëta i ka dënuar ashpër kryetari i Komunës së Klinës, z. Sokol Bashota dhe ka kërkuar që organet e policisë dhe ato hetimore të angazhohen në gjetjen e personave keqbërës, po ashtu edhe të marrin dënimet meritore.
Kryetari i Komunës kërkon nga organet kompetente që të bëjnë kontrollime më të shpeshta të terrenit në mënyrë që rritet niveli i sigurisë për të gjithë qytetarët e Komunës pavarësisht prejardhjes së etnisë së tyre.
