Kryetari i Komunës së Klinës, z. Sokol Bashota, pas suksesit të policisë së Klinës dhe asaj Rajonale me rastin e kapjes dhe të arrestimit të disa plaçkitësve, që u kanë bërë disa familjeve të komunitetit serb në Klinë dhe disa lokalitete të kësaj komune, për këtë efikasitet ka falënderuar këto organe të sigurisë, po ashtu edhe për bashkëpunimin dhe ngritjen e sigurisë në Klinë dhe lokalitetet që gravitojnë në këtë komunë. Kohëve të fundit disa shtëpi të komunitetit serb kanë cak i grabitjeve të disa personave keqbërës, të cilët në këto shtëpi kanë grabitur gjësende të ndryshme, si para (euro dhe dinarë serb), traktorë, prishje të serave etj. Mirëpo, pas efikasitetit që ka treguar policia e Klinës dhe ajo Rajonale këta keqbërës janë zënë dhe po trajtohen në organet e policisë.
Prandaj, si shprehje e këtij suksesi të Policisë, kryetari Bashota, ka falënderuar policinë dhe ka premtuar se Komuna si institucion do të mbështes në të gjitha rastet Policinë e Kosovës.
“Ne si Komunë, në bashkëpunim me Policinë, më shumë po punojmë në krijimin e besimit të qytetarëve te Policia e Kosovës dhe te institucionet, në përgjithësi. Ne do të fuqizojmë edhe më shumë imazhin e Policisë së Kosovës pasi që Policia deri tani, në Komunën e Klinës, ka pasur besimin më të madh dhe imazhin më të mirë dhe kështu do të vazhdojmë. Ato që kemi bërë deri tani kanë qenë minimale dhe jemi të gatshëm të thellojmë bashkëpunimin në mënyrë që qytetari ynë të ndjehet plotësisht i sigurt, duke pasur besim te institucionet e veçmas te policia “- ka shtuar, veç tjerash, kryetari Bashota.
