Komuna e Klinës ka mbajtur dëgjimin e katërt buxhetor për Draft-Buxhetin e vitit 2025, ku pjesëmarrës ishin banorët e fshatit Përçevë. Ky dëgjim u zhvillua më 15 gusht 2024, në ambientet e shkollës së mesme të ulët “Xhafer Gashi”, me fillim nga ora 18:30, dhe me pjesëmarrje të 17 personave.
Të pranishëm në këtë takim ishin Kryetari i Komunës së Klinës, Prof. Dr. Zenun Elezaj, Drejtori i Urbanizmit dhe Mbrojtjes së Mjedisit, z. Enver Berisha, Drejtori i Inspektoratit, z. Faruk Smajli, këshilltarja e Kuvendit Komunal, znj. Blerta Gashi, si dhe anëtarë të grupit punues dhe banorë të zonave përkatëse.
Gjatë këtij takimi, Kryetari i Komunës, Prof. Dr. Zenun Elezaj, theksoi rëndësinë e buxhetit të vitit 2025, i cili është i fokusuar në avancimin e infrastrukturës publike dhe përmirësimin e shërbimeve për qytetarët. Ai vuri në dukje rëndësinë e pjesëmarrjes aktive të qytetarëve në procesin e hartimit të buxhetit, duke theksuar se sugjerimet dhe kërkesat e tyre janë thelbësore për zhvillimin e politikave efektive dhe për realizimin e projekteve që i shërbejnë më së miri interesave të komunitetit.
Ndërkohë, Drejtori i Urbanizmit dhe Mbrojtjes së Mjedisit, z. Enver Berisha, shtoi se buxheti i këtij viti përfshin projekte të rëndësishme infrastrukturore, të cilat synojnë përmirësimin e rrjetit të rrugëve dhe zhvillimin e qëndrueshëm të zonave rurale. Ai falënderoi banorët për rekomandimet e tyre, të cilat do të shqyrtohen me kujdes dhe do të integrohen në planifikimin përfundimtar të buxhetit.
Banorët pjesëmarrës rekomanduan ndërtimin e rrugëve fushore dhe riparimin e rrugëve ekzistuese në fshat. Këto sugjerime janë konsideruar me prioritet nga Komuna e Klinës dhe do të përfshihen në projektet e ardhshme të realizimit të buxhetit.
Agjenda e takimeve të ardhshme:
Dëgjim publik me banorët e komunës së Klinës, me fokus banorët e fshatrave Shtupel, Kërrnicë, Binxhë, Grabc dhe Dranashiq.
o Data: 19.08.2024
o Ora: 17:00
o Vendi: SHFMU “Avni Zhabota”, Shtupel
Dëgjim publik me banorët e komunës së Klinës, me fokus banorët e fshatrave Budisalc, Zllakuqan, Ranoc, Leskoc, Nagllavë, Dranashiq, Stupë, Rudicë, Videjë, Jagodë, Bërkovë, Krushevë dhe fshatrat e tjera.
o Data: 19.08.2024
o Ora: 19:00
o Vendi: SHFMU “Atë Shtjefën Gjeçovi”, Zllakuqan
Komuna e Klinës fton të gjithë qytetarët të marrin pjesë në këto dëgjime dhe të japin kontributin e tyre në procesin e hartimit të buxhetit për vitin 2025.
