Në sallën e konferencave, në komunën e Klinës është mbajtur takimi i tretë me radhë i punës i grupit punues për hartimin e Planit Lokal për Veprim në Mjedis (PLVM). Ky plan është dokument planifikues – strategjik, për të adresuar zgjidhjen e problemeve mjedisore në nivel lokal.
Në takim mori pjesë nënkryetarja e komunës së Klinës, znj. Marqe Tanushi-Selmanaj, drejtori i KRM “Ambienti”, njësisë në Klinë, z. Idriz Beqiri, znj. Vitore Zefi nga qendra rinore “Ardhmëria”, zyrtarja Kryesore Financiare, znj.Melihate Behramaj, zyrtarja për Mbrojtjen e Mjedisit, znj. Xhezide Gashi – Trepça si dhe inspektori i Mjedisit, z. Dardan Bashota.
Nënkryetarja Selmanaj theksoi se ky plan ka për qëllim të identifikojë problemet mjedisore, të përcaktojë prioritetet në sektorin e mjedisit dhe të ofrojë zgjidhje për problemet prioritare mjedisore, duke synuar një menaxhim sa më efikas të tyre, duke i vendosur ato në agjendën e institucioneve përgjegjëse.
Sipas grupit punues ky dokument planifikues – strategjik, ka këto objektiva specifike:
– Të bëjë vlerësimin e gjendjes ekzistuese të mjedisit dhe ndikimeve në mjedis nga sektorët e ndryshëm zhvillimor;
– Të identifikojë dhe përcaktojë problemet kryesore mjedisore në territorin e komunës së Klinës;
– Të identifikohen dhe përcaktohen prioritetet kryesore që do të adresohen në kuadër të PLVM-së për periudhën 5-vjeçare;
– Të planifikohen dhe përcaktohen afatet, aktivitetet dhe projektet që do të ndërmerren për adresimin e prioriteteve të identifikuara.
Grupi punues gjithashtu njofton që ky plan pritet shumë shpejtë të dalë në konsultim publik dhe qytetarët e grupet e tjera të interesit mund të kontribuojnë me rekomandimet, vërejtjet dhe idetë e tyre.
