Kryetari i Komunës së Klinës Zenun Elezaj, i shoqëruar nga Drejtoresha e Bujqësisë, Ilirjana Toplanaj, kanë pritur në takim Drejtorin e IADK-së, Zenel Bunjaku, me të cilin ka nënshkruar Marrëveshjen për Bashkëpunim për zbatimin e projektit “Përmirësimi i punësimit dhe mundësive për gjenerim të të ardhurave në zonat rurale”.
Projekti financohet nga donatori gjerman Brot für die Welt (BfdW) dhe bashkëfinancohet nga Komuna e Klinës. Projekti synon përkrahjen e fermerëve, grave, të rinjve dhe studentëve përmes granteve dhe aftësimit profesional, me fokus të veçantë në zonat rurale. Përmes kësaj marrëveshjeje pritet të rriten kapacitetet prodhuese, të krijohen mundësi të reja punësimi dhe të gjenerohen të ardhura të qëndrueshme për komunitetin lokal.
Elezaj ka theksuar se mbështetja për sektorin e bujqësisë do të jetë e vazhdueshme, në funksion të zhvillimit ekonomik dhe fuqizimit të zonave rurale.
