Komuna e Klinës dhe USAID-i, do të realizojnë një projekt të përbashkët për menaxhimin e mbeturinave, saktësisht në sigurimin e kontejnerëve të mbeturinave.
Është nënshkruar memorandum mirëkuptimi në mes kryetarit të Komunës së Klinës, z Sokol Bashota dhe zyrtarëve të CDF-së, që implementojnë këtë projekt. USAID-i për këtë projekt ka ndarë 39 547 euro, ndërsa , komuna 6983 euro. Vlera totale e projektit është 46 mijë e 557 euro. Projekti, “Menaxhimi i mbeturinave, tregjeve funksionale dhe mjedisit”, është në kuadër të programit: “Avancojmë Kosovën së Bashku – Alternativa Lokale”, e financuar nga Agjencia e Shteteve të Bashkuara për Zhvillim Ndërkombëtar ( USAID) dhe implimentuar nga Fondi për Zhvillimin e Komunitetit (CDF). “ Klina është në mesin e 16 komunave të Kosovës që ka përfituar në këtë projekt. Ky është një projekt që do të ndihmojë Klinën në krijimin e ambientit sa më të pastër derisa gjitha fshatrat e kësaj komune tashme janë në sistem të organizimit të mbledhjes së mbeturinave. Pagesa e qytetareve është mjaft e mirë. Jemi të gatshme për bashkëpunim në çdo kohë për të mirën e qytetareve të saj”, ka thënë kryetari i Komunës së Klinës, z Sokol Bashota. Ndërkaq, Gjokë Lleshaj, drejtor i Shërbimeve Publike e Emergjente, thotë se përmes këtij projekti synojmë blerjen e 2000 kontejnerëve të cilët do të shpërndahen në 14 lokalitetet në zonat rurale. Komuna e Klinës në të ardhmen planifikon që në të gjitha lokalitetet të ketë kontejnerëve të mbeturinave. Në anën tjetër zyrtarët e CDF-së që do të implimentojnë këtë projekt, janë shprehur të kënaqur me bashkëpunimin që ka ofruar Komuna e Klinës në realizimin e këtij projekti si dhe shkallën e mirë të pagesës së qytetarëve për shërbimet e mbeturinave që i kryen kompania publike “ Ambienti” në Klinë.
