Këshilli Komunal për Siguri në Bashkësi (KKSB) zhvilloi takimin e pestë për këtë vit në sallën e Kuvendit Komunal të Klinës. Takimin e udhëhoqi nënkryetarja e Komunës, znj. Marqe Tanushi Selmanaj, e cila njëherazi kryeson Këshillin.
Në takim ishin të pranishëm përfaqësues nga institucionet kyçe të komunës, përfshirë drejtorin e Arsimit, z. Qemajl Sejdija, përfaqësuesin e stacionit të Policisë në Klinë, z. Besnik Qupeva, dhe anëtarët e tjerë të Këshillit për Siguri në Bashkësi.
Pikat kryesore të rendit të ditës përfshinë:
1. Organizimi i fushatave vetëdijesuese;
2. Siguria në trafik;
3. Raportimi dhe parandalimi i dhunës në familje;
4. Informimi mbi mirëmbajtjen e infrastrukturës rrugore dhe trotuareve për sezonin dimëror;
5. Çështje të ndryshme.
Gjatë fjalës së saj, znj. Selmanaj nënvizoi rëndësinë e bashkëpunimit të ngushtë mes institucioneve komunale, sektorit të sigurisë dhe organizatave të ndryshme për të arritur objektiva konkrete që pasqyrojnë nevojat reale të qytetarëve. “Është thelbësore që secili prej nesh, në rolin që ka, të kontribuojë në mënyrë aktive për ndërtimin e një mjedisi ku të gjithë qytetarët ndihen të mbrojtur, të respektuar dhe të përfshirë. Siguria dhe mirëqenia e qytetarëve tanë nuk është vetëm përgjegjësi e institucioneve, por edhe një angazhim i përbashkët i gjithë komunitetit. Vetëm përmes bashkëpunimit të sinqertë dhe përkushtimit të plotë mund të përballojmë sfidat që paraqiten në përditshmërinë tonë”.
Takimi i pestë i Këshillit Komunal për Siguri në Bashkësi për vitin 2024 dëshmoi edhe një herë përkushtimin e përbashkët të institucioneve dhe komunitetit për të ndërtuar një qytet më të sigurt. Diskutimet dhe vendimet e marra gjatë këtij takimi theksuan rëndësinë e përgatitjes dhe veprimit të menjëhershëm në fusha kyçe të sigurisë dhe mirëqenies publike. KKSB angazhohet të zbatojë rekomandimet dhe nismat e diskutuara, me synim përmirësimin e cilësisë së jetës për të gjithë qytetarët e Klinës.
