Në sallën e Kuvendit Komunal të Klinës u mbajt takimi i tretë me radhë i Këshillit Komunal për Siguri në Bashkësi, i udhëhequr nga nënkryetarja e komunës, znj. Marqe Tanushi – Selmanaj. Gjithashtu në takim ka marrë pjesë edhe z. Besnik Qupeva, përfaqësues i Policisë së Rajonit në Klinë, si dhe anëtarë të këtij Këshilli.
Në fillim të takimit nënkryetarja Tanushi – Selmanaj, vuri në dukje rëndësinë e bashkëpunimit të ngushtë ndërmjet organeve komunale dhe qytetarëve, duke thënë se “Vetëm përmes një bashkëpunimi të mirëfilltë mund të sigurojmë një mjedis të sigurt dhe të qetë për të gjithë qytetarët e komunës sonë.”
Gjithashtu, nënkryetarja Tanushi – Selmanaj prezantoi rendin e ditës, i cili u aprovua nga anëtarët e rregullt të Këshillit, ku në rend të ditës ishin temat: Diskutimi i aktiviteteve të organizuara nga Drejtoria e Arsimit për maturantët ku u theksua rëndësia e koordinimit të aktiviteteve edukative dhe sociale për maturantët, me qëllim përgatitjen e tyre për sfidat e ardhshme. Gjithashtu u diskutua nevoja për ndërhyrje të policisë dhe organeve të tjera përkatëse për të siguruar rendin publik dhe për të mbrojtur qytetarët nga sjelljet e paligjshme. Në një pik të veçantë u diskutua edhe për parapërgatitjet dhe vetëdijesimin e qytetarëve për mbrojtjen nga zjarri gjatë sezonit veror dhe vërshimeve gjatë vitit; utheksua rëndësia e edukimit të qytetarëve për masat mbrojtëse kundër zjarreve dhe vërshimeve, me qëllim minimizimin e rreziqeve dhe dëmeve. Në fund u prezantua një plan operativ për menaxhimin e sezonit të pushimeve dhe aktivitetet e dasmave, për të siguruar rendin dhe qetësinë publike gjatë këtyre periudhave.
Përfaqësuesi i Policisë së Rajonit në Klinë, z. Besnik Qupeva, foli për gjendjen aktuale të sigurisë në komunë, duke theksuar se “Policia është e përkushtuar për të garantuar sigurinë e qytetarëve dhe për të ndërmarrë masa të menjëhershme kundër çdo shkeljeje të rendit publik.” Kjo mbledhje shërbeu si një platformë e rëndësishme për të adresuar çështje të ndryshme të sigurisë dhe për të koordinuar veprimet e nevojshme për të garantuar një ambient të sigurt për të gjithë banorët e Klinës.
