FESTA E KËNGËS SHQIPTARE Ky është viti i gjashtë që Festivali “I këndojmë lirisë” nxjerr buletinet e veta, kurse qe dy vite nxjerr edhe të përkohshmen “LYRA plus”.
Emërtimi është simboli i veglës së moçme muzikore, “Lyra”. E “Lyra” doli në dritë në ditëlindjen e 36-të të komandantit e rapsodit dëshmor, Mujë Krasniqit, më 6 qershor. Tani është ditëlindja e tij e dyzetenjëtë… U këndua kënga jonë në qytetin e lashtë ilir, Klinës, që daton prej shekullit të parë mbas erës së re. Qe tetë vite po na përcjellin zërat e këngëve e të valleve shqiptare. Është e kremtja e Këngës Shqiptare. E kjo, ç’t’i bësh, kështu ishte gjithmonë: kënga e kënduar në luftë, si tha një etnomuzikolog yni, nuk këndohej për para, për komercializim as për biznes, po për ta luftuar armikun edhe me këngë. Edhe Këshilli Organizativ qe tetë vite punoi pa kompensim! Kënga, për armikun, ishte po aq e rrezikshme, sa edhe arma, tha dr. Muzafere Mustafa. E sot? Sot, xhepi për kulturën është i cekët, por aty është solidariteti i kouinasve… Ne i përcollën të gjitha aktivitetet e Festivalit me aq sa na lejuan kushtet dhe rrethanat. Botuam poezi, tekste këngësh popullore, shkrime autoriale që i kushtohen Mujë Krasniqit, raporte ditore të Festivalit. Punuam e kremtuam qe tetë vite në shoqëri me Këngën Shqiptare. Është festë, apo jo. E fjalët e serta do t’i lëmë për një herë tjetër.