Me moton “Ti je pjesë e atdheut” dje u organizuan shumë aktivitete kulturore dhe promovuese në Klinë. Nën përkujdesjen e Kryetarit të Komunës, z. Sokol Bashota, aktivitetet për shënimin e “Ditët e Diasporës” filluan me datë 31 korrik me organizmin e një ndeshjeje në futboll në mes të KF”Dukagjinit” nga Klina dhe ekipit të futbollit nga Federata shqiptare e futbollit në Gjermani. Ndërsa dje me 2 gusht pas pritjes së mërgimtarëve në zyre dhe takimit me ta, kryetari Bashota morri pjesë në promovimin e librit “Dëshmi në Kohë” të autorit nga Klina i cili jeton dhe vepron në SHBA, gazetarit shumëvjeçar dhe publicistit Luz P. Thaqi. Në këtë promovim ku morën pjesë shumë qytetarë të Klinës e në veçanti mërgimtarë të shumtë, ishin të pranishëm edhe Ministri për Diasporë, Valon Murati, Rektori i UP, Marjan Dema, anëtari i gjykatës kushtetuese, Bekim Sejdiu, Blerim Latifi etj.
Kryetari Sokol Bashota në fjalën e tij në fillim të këtij promovimi theksoi se libri “Dëshmi në kohë” është vet Luzi. Puna e tij, aktiviteti i tij gazetaresk, letrarë dhe veprimtaria e tij janë dëshmi që asnjë kohë nuk do ti shlyej. “Uroj dhe shpresoj që në vitin e ardhshëm, Luzi të na vijë në vendlindje edhe me një libër tjetër”, theksoi Kryetari Bashota në përmbyllje të fjalës së tij.
Në kuadër të manifestimit “Ti je pjesë e atdheut” u organizua edhe një panair i vogël me prodhime vendore dhe një ekspozitë figurative e piktorëve klinas. Panair ky i pari i këtij lloji i organizuar në Komunën e Klinës.
