Komuna e Klinës ka mbajtur dje edhe takimin e tretë buxhetor për Kornizën Afatmesme Buxhetore 2025-2027, në fshatin Zajm, me banorët e fshatrave Zajm, Gremnik, Deiq, Dollc dhe Dresnik, i cili është mbajtur në ambientet e shkollës së mesme të ulët “Motrat Qiriazi”, në orën 19:00.
Të pranishëm ishin kryetari i Komunës së Klinës, Prof. Dr. Zenun Elezaj, drejtori i Arsimit, Qemajl Sejdija, drejtori i Inspektoratit, Faruk Smajli, udhëheqësi i departamentit të Financave, Burim Hoti, anëtarë të grupit punues si dhe banorë të zonave të lartcekura.
Në takim është diskutuar mbi nevojat dhe prioritetet e banorëve dhe inkuadrimin e tyre në prioritetet e viteve 2025-2027. Kryetari falënderoi të gjithë të pranishmit për pjesëmarrje dhe kontributin e dhënë në përpilimin e ideve dhe ndarjeve buxhetore për vitet e ardhshme dhe gjithashtu foli mbi investimet që po realizohen në këto fshatra, ndërtimin e shkollës së re “Azem Bejta’, trotuarin, ndriçimin në rrugën kryesore etj.
“Mirënjohje për pjesëmarrjen tuaj në dëgjimet buxhetore. Bashkëpunimi ynë është thelbësor për të siguruar një qeverisje gjithëpërfshirëse dhe të përshtatshme për nevojat e komunitetit tonë. Faleminderit për kontributin tuaj në këtë proces të rëndësishëm.” – ka thënë në fund Elezaj.
Komuna e Klinës vazhdon me takimet e radhës, të hënën, datë 3 qershor në lokalitetet: SHFMU “Ali Krasniqi”, në Ujmirë, me banoret e fshatrave Ujmirë, Siqevë, Dobërdol dhe Çabiq, ora 16:30, Salla e Sporteve “Jetoni”, në fshatin Gllarevë, me banorët e fshatrave Gallarevë, Rixhevë, Stapanicë, Zabergjë dhe Caravik, ora 17:30, si dhe në SHFMU “Tre Dëshmorët”, në fshatin Jashanicë, me banorët e fshatrave Jashanicë, Pogragjë, Dush i Vogël, Resnik, Jelloc dhe Gjurgjevik i Madh, ora 19:00.
