Komuna e Klinës ka mbajtur takimin e katërt buxhetor për Kornizën Afatmesme Buxhetore 2025-2027 në Ujmirë, me banorët e fshatrave Ujmirë, Siqevë, Dobërdol dhe Çabiq, i cili është mbajtur në ambientin e shkollës së mesme të ulët “Ali Krasniqi”, në orën 16:30.
Të pranishëm ishin kryetari i Komunës së Klinës, Prof. Dr. Zenun Elezaj, drejtori i Urbanizmit, Enver Berisha, drejtori i Shërbimeve Publike, Qendrim Millaku, udhëheqësi i departamentit të Financave, Burim Hoti, anëtarë të grupit punues si dhe banorë të zonave të lartcekura.
Gjatë takimit janë diskutuar nevojat dhe prioritetet e banorëve dhe inkuadrimin e tyre në prioritetet e viteve 2025-2027 si dhe është folur për investimet e kryera dhe ato që janë në plan të realizohen në këto lokalitete.
“Dëshiroj të shpreh falënderimin tim të thellë për pjesëmarrjen e të gjithë qytetarëve në dëgjimet buxhetore. Bashkëpunimi dhe përkushtimi i tyre janë thelbësore për të siguruar një proces të përbashkët dhe transparent në hartimin dhe zbatimin e buxhetit tonë komunal. Dëgjimet buxhetore paraqesin një mundësi të çmuar për të dëgjuar zërat dhe nevojat e çdo individi në komunën tonë” – ka thënë Elezaj.
Ndërsa, udhëheqësi i departamentit të Financave, Burim Hoti, ka bërë një prezantim të shkurtër duke prezantuar pikat e rëndësishme të draft-kornizës, ku në veçanti u ndal tek projektet kapitale ndër vite.
Në fund, takimi u mbyll pasi qytetarët dhanë mendimet e tyre.
