Përfaqësues të Komitetit Olimpik të Kosovës, takuan zyrtarë të pushtetit lokal, përfaqësues të bizneseve dhe klubeve sportive të Klinës. Sponsoruesve për sponsorizimet në aktivitetet e sportit u njihet zbritja në vlerë prej tridhjetë për qind (30%) nga tatimi në fitim sipas ketij ligji.
Përfaqësues të Komitetit Olimpik të Kosovës, Besim Hasani, president, Shasivar Haxhijaj, sekretar i përgjithshëm dhe Ramadan Selimi, anëtar i Bordit të KOK-ut, kanë zhvilluar sot një takim me kryetarin e Komunës së Klinës, Zenun Elezaj dhe nënkryetarin Besim Hoti, si dhe drejtorët, Skënder Merturin e Lorenc Marlekun, me të cilin është biseduar për Ligjin për Sponsorizim.
Në këtë takim është thënë se Ligji i ri krijon lehtësi dhe hapësirë për bizneset që të mbështesin klubet sportive, të cilat janë në gjendje të rëndë dhe kanë mbetur në mëshirë të subvencioneve nga komunat që nuk janë të mjaftueshme për kryerjen e misionit të tyre.
Kryetari i Komunës së Klinës, Zenun Elezaj, ka thënë se po mundohemi që me subvencione të mbajmë gjallë klubet e Komunës së Klinës, por kjo është një ndihmë e vogël krahasuar me nevojat që kanë ekipet, prandaj për të tejkaluar këtë situatë kërkojmë mbështetje nga bizneset.
Pasdite, përfaqësuesit e KOK-ut dhe kryetari Elezaj, kanë takuar përfaqësuesit e biznesit dhe klubeve të Klinës. Hasani dhe Haxhijaj, kanë sqaruar se tashmë me Ligjin për Sponsorizim të Sportit, bizneset kanë mundësi që 30 % të obligimeve të tyre ndaj shtetit t’i dedikojnë për klubet sportive.
Sponsoruesve për sponsorizimet në aktivitetet e sportit u njihet zbritja në vlerë prej tridhjetë për qind (30%) nga tatimi në fitim sipas ketij ligji.
Në rastin konkret, nëse një biznes i ka obligim shtetit 10 mijë euro, mund t’i ndajë 3000 euro për klubet sportive. Bizneset janë zotuar se do të angazhohen në ndihmën e klubeve sportive të Klinës. Storja më e mirë në Kosovë është sporti. Të gjithë duhet të angazhohemi për zhvillimin e sportit”, ishte konstatim i përgjithshëm nga ky takim.
