Kryetari i Komunës së Klinës, Prof. Dr. Zenun Elezaj i shoqëruar nga drejtoresha për Kulturë, Rini dhe Sport, znj. Fatjona Gashi, vizituan bibliotekën e qytetit, “Kongresi i Manastirit”, ku bashkë me stafin kanë pranuar donacion nga Ministria e Kulturës, Rinisë dhe Sportit, rreth 740 ekzemplarë, 227 tituj të rinj të librave, ku vlen të theksohet se një numër i këtyre librave janë të shkruara në alfabetin Braj (Braille) që i është dedikuar personave të verbër si dhe një numër gjithashtu i titujve i dedikohet komuniteteve joshqiptare.
Kryetari Elezaj dhe drejtoresha Gashi, me këtë rast falënderuan Ministrinë e Kulturës, Rinisë dhe Sportit, për donacionin në fjalë dhe theksuan se bashkëpunime të tilla nuk do të mungojnë asnjëherë, të cilat do të realizohen në bashkëpunim me komunën e Klinës. Investime të tilla në bibliotekën e qytetit janë duke vazhduar për të katërten herë me radhë si në pasurimin e titujve gjithashtu edhe në rregullimin e hapësirave dhe infrastrukturës së bibliotekës, duke ofruar kushte më të mira për lexuesit.
