Në Klinë u mbajt takimi në mes të udhëheqjes së Komunës së Klinës dhe përfaqësuesve të Agjencionit të Zhvillimit Rajonal (AZHR-Perëndim).
Në këtë takim morën pjesë kryetari i Komunës, Prof. Dr. Zenun Elezaj, kryesuesi i Kuvendit të Komunës, Fadil Gashi, si dhe drejtorët e drejtorive komunale.
Ndërkaq ekipin e Agjencionit e udhëhoqi, Ms. Leman Hatashi, drejtoreshë e këtij agjencioni.
Ky takim në mes të udhëheqjes komunale dhe AZHR –Perëndim, kishte karakter informues për projekt-idetë për zhvillimin e Komunës së Klinës, me qëllim të përmirësimit të kualitetit të jetës së qytetarëve, ofrimit të një ambienti ekonomik që është i përshtatshëm për krijimin e biznesit, rritja e masave të zhvillimit ekonomik etj.
AZHR – Perëndim ka për qëllim nxitjen e bashkëpunimit rajonal, me ç’rast është i fokusuar në tri strategji zhvillimore: për zhvillim të turizmit; për zhvillimin, përkatësisht promovimin e investimeve dhe për zhvillim të transportit.
Me këtë rast, drejtorët e drejtorive të ekzekutivit para përfaqësuesve të këtij agjencioni shpalosën projekt-idetë prioritare në fusha të caktuara, ku mund të investohet.
Ndërkaq, u bisedua për projektet që do të mund të investohen nga IPA programit të BNK Mali i zi – Kosovë.
Kryetari Elezaj falënderoi përfaqësuesit të këtij agjencioni për interesimin dhe shprehu optimizmin që në të ardhmen bashkëpunimi të vazhdojë në të mirë të qytetarëve jo vetëm të Komunës së Klinës, por edhe të këtij regjioni dhe më gjerë.
